ՀՀ Արտաքին գործերու նախարարութեան նախաձեռնութեամբ, 9-11 Սեպտեմբերին կայացուելիք «Երեւան երկխօսութիւն» համաժողովին ընդառաջ, արտաքին գործերու նախարար Արարատ Միրզոյեան հանդէս եկած է ուղերձով, որուն մէջ նշած է.
«Աշխարհն արագօրէն փոխւում է մեր աչքի առաջ։ Համաշխարհային յարաբերութիւնների փոփոխուող պատկերը, միջազգային իրաւունքի քայքայումը, բազմակողմ համակարգի ճգնաժամը լուրջ մարտահրաւէրներ են ներկայացնում: Ժողովրդավարութիւնը բախւում է բարդութիւնների: Խաղաղութեան եւ անվտանգութեան ոլորտում համագործակցութեան նուազումը սպառնում է խարխլել համաշխարհային կարգի հիմքերը: Հիպրիտային սպառնալիքներն ու կլիմայի փոփոխութիւնն ազդում են մարդկանց ամէնօրեայ կեանքի վրայ աշխարհի աւելի շատ անկիւններում:
Միեւնոյն ժամանակ մենք ականատես ենք լինում Ասիայի եւ Եւրոպայի միջեւ աւելի լաւ փոխկապակցուածութեան եւ նոր ճանապարհների ապահովման փնտռտուքի, ինչպէս նաեւ թուայնացման, նորարարությեան ոլորտներում արհեստագիտական նշանակալի յառաջընթացի:
Բոլոր փոփոխութիւնները ցոյց են տալիս, որ ամուր, համախոհ դերակատարների հետ եւ արժէքների վրայ հիմնուած գործընկերությունն աւելի էական է, քան երբեւէ:
Մեր տարածաշրջանը` Հարաւային Կովկասը, որը պատմականօրէն եղել է մշակութային եւ խոշոր առեւտրային ուղիների հատման կէտում, այսօր կանգնած է կարեւոր խաչմերուկում: Այն բախուել է հսկայական ցնցումների, այդ թւում՝ այնպիսի զարգացումների, որոնք մեծապէս ազդել են մարդկային կեանքի եւ տարածաշրջանի ընդհանուր տնտեսական զարգացման, դրա ներկայի եւ ապագայի վրայ: Մենք այս պահին պատմական փուլում ենք՝ աւելի խաղաղ, ապահով եւ բարեկեցիկ ապագայի ճիշդ ընտրութիւն կատարելու, ճիշդ ճանապարհով ընթանալու իրական հնարաւորութեամբ։
Երկխօսութիւնն ու բաց քննարկումները բացը լրացնելու կարեւոր նախապայման են եւ իւրայատուկ միջոց: Անցկացուելով առաջին անգամ՝ «Երեւան երկխօսութիւնը» կ’ապահովի կարեւոր հարթակ՝ հնչեցնելու թիրախային հարցեր, տարբերուող կարծիքներ ու համադրուող պատասխաններ, որոնելու կայուն լուծումներ: Այդ նպատակով մենք հրաւիրել ենք դիւանագիտութեան, քաղաքականութեան, գործարար, գիտութեան եւ մշակոյթի ոլորտի առաջնորդների եւ փորձագէտների աւելի քան 80 երկրներից եւ կազմակերպութիւններից: Մենք սպասում ենք բոլորի աշխոյժ մասնակցութեանն ու ներդրումին՝ նպատակ ունենալով հասցէագրել մերօրեայ հրատապ խնդիրները՝ «ապագան կառուցելով այսօր»»:
