Անգամ մը եւս, Լիբանանի մէջ ամռան տօթին կ’ընկերակցի ելեկտրամատակարարումի ամբողջական խափանումը՝ վառելանիւթի անբաւարարութեան պատճառով: Այս էր շաբաթավերջի օրերուն իրավիճակը, մինչ Ելեկտրականութեան հաստատութիւնը կարողացաւ նուազագոյն ժամերով ելեկտրականութիւն մատակարարել Պէյրութի օդակայանին, Ջուրի հաստատութիւններուն եւ շարք մը պետական տարրական այլ կեդրոններու՝ վառելանիւթ փոխ առնելով Զահրանիի քարիւղային հաստատութենէն: Երէկ ժողով մը գումարեց նաեւ Լիբանանի Ելեկտրականութեան հաստատութեան խորհուրդը, որ համաձայնեցաւ 20 միլիոն տոլարի գումար փոխանել Լիբանանի Կեդրոնական դրամատան, որպէսզի կարելի ըլլայ վճարել Իրաքէն ուղարկուելիք վառելանիւթին սակագինը: Կը նախատեսուի, որ քարիւղատար «Spot Cargo» նաւը Լիբանան հասնի 24 Օգոստոսին եւ փոխադրէ 30 հազար քիլոլիթր քարիւղ, որպէսզի այդ թուականէն սկսեալ վերաբնականոնանայ ելեկտրամատակարարումը:
Այս տագնապահար վիճակի լոյսին տակ, վարչապետի պաշտօնակատար Նեժիպ Միքաթի երէկ երեկոյեան յայտնեց, որ հաղորդակցութիւններու շնորհիւ Ալճերիոյ նախագահ Ապտ ալ Մաճիտ Թապպուն յանձնարարած է անյպաղ Լիբանանին տրամադրել վառելանիւթի որոշ բեռ, որպէսզի կարելի ըլլայ յաղթահարել այս ծանր փուլը: Միքաթի շնորհակալութիւն յայտնեց նախագահին, իսկ վարչապետին փոխանցեց Լիբանանի երախտագիտութիւնը՝ Ալճերիոյ մնայուն աջակցութեան համար:
