Վարչապետի պաշտօնակատար Նեժիպ Միքաթի Լիբանանի յանձնառութիւնը յայտնեց բռնագրաւեալ հողերը ազատագրելու եւ Լիբանանի գերիշխանութիւնը պաշտպանելու իրաւունքին: Գործող կառավարութեան երէկ գումարած նիստին ընթացքին Միքաթի դատապարտեց Կազայի մէջ Իսրայէլի գործած ոճիրները եւ հարաւային Լիբանանի մէջ շարունակուող ոտնձգութիւնները, միջազգային ընտանիքէն պահանջելով միջամտել եւ վերջ դնել պաղեստինցիներուն նկատմամբ գործուող ցեղասպանութեան: «Լիբանան յանձնառու կը մնայ ՄԱԿ-ի 1701 բանաձեւին ու կը պահանջէ որ ան գործադրուի բոլորին կողմէ՝ որպէս որեւէ լուծումի բանալին», ըսաւ Միքաթի:
Անդրադառնալով ներլիբանանեան քաղաքական նիւթերուն, Միքաթի վերստին կոչ ուղղեց արագացնելու Հանրապետութեան նոր նախագահի ընտրութիւնը եւ վերջ տալու քաղաքական տարակարծութիւններուն՝ յանուն պետական հաստատութիւններու հեզասահ աշխատանքի վերականգնումին եւ քաղաքացիներու բարօրութեան:
