Զինադադարի սպասումով սակայն, Լիբանանի հարաւային շրջանները երէկ վերստին ականատես դարձան իսրայէլեան ծանր ռմբակոծութեան: Առողջապահութեան նախարարութիւնը յայտարարեց, թէ Մարժաայունի թիրախաւորումէն կայ երկու զոհ եւ չորս վիրաւոր, իսկ Պլիտայի ռմբակոծութեան պատճառով մահացած է մարդ մը: Սուր գաւառի Ապպասիէ շրջանը առաջնորդող ճամբուն թիրախաւորումէն վիրաւորուեցաւ առնուազն 17 լիբանանցի, սուրիացի եւ պաղեստինցի՝ ներառեալ կիներ, երեխաներ ու պատանիներ: Վիրաւորներուն մէկ մասը ստացաւ անհրաժեշտ բուժում եւ դուրս եկաւ հիւանդանոցէն, սակայն հինգ վիրաւորի վիճակը ծանր է: Իսկ Ռապ Սալասին գիւղի թիրախաւորումէն վիրաւորուեցաւ երկու մարդ: Իսրայէլեան հարուածները չխնայեցին նաեւ Հուլան եւ Պլիտան:
«MEA» օդանաւային ընկերութիւնը յայտարարեց, թէ 14-18 Օգոստոսի թռիչքներուն ժամանակացոյցը կը մնայ գրեթէ անփոփոխ, բացի որոշ թռիչքներէ: Իսկ Ֆրանսական «Air France» ընկերութիւնը յայտարարեց, թէ այսօր պիտի վերսկսին Պէյրութ ուղղուող թռիչքները, որոնք առկախուած էին 29 Յուլիսէն ի վեր: Ըստ ընկերութեան, իրավիճակը ամէն օր պիտի ենթարկուի արժեւորումի՝ ի տես տարածաշրջանին մէջ տիրող անկայունութեան եւ վտանգներու առկայութեան: Յայտարարութեան մէջ կը նշուի, թէ պիտի վերսկսին նաեւ ֆրանսական «Transavia» ընկերութեան թռիչքները:
