«ՊԻՏԻ ՊԱՅՔԱՐԻՆՔ ՄԻՆՉԵՒ ՎԵՐՋ».

ՓՈԽՆԱԽԱՐԱՐ ԳԻԼՈՅԵԱՆԸ՝ ԱՐԹՈՒՐ ԱԼԵՔՍԱՆԵԱՆԻ ԱՒԱՐՏԱԿԱՆ ԳՕՏԵՄԱՐՏԻ ԲՈՂՈՔԱՐԿՄԱՆ ԸՆԹԱՑՔԻՆ ՄԱՍԻՆ

Փարիզի «Սթատ տէ Ֆրանս» մարզադաշտին վրայ կայացած ամառնային 33-րդ Ողիմպիական խաղերու փակման հանդիսաւոր արարողութեան ընթացքին Հայաստանի դրօշակակիրը եղած է յունահռոմէական ոճի ըմբիշ, Ողիմպիական խաղերու ոսկէ, արծաթէ եւ պրոնզէ մետալակիր, աշխարհի քառակի եւ Եւրոպայի եօթակի ախոյեան Արթուր Ալեքսանեանը:

ՀՀ կրթութեան, գիտութեան, մշակոյթի եւ մարմնամարզի նախարարի տեղակալ Կարէն Գիլոյեանը ամփոփած է հայ մարզիկներուն մրցելոյթները, խօսած է Փարիզ-2024-ի կազմակերպչական հարցերուն, 28 Օգոստոսէն մեկնարկելիք Փարալիմպիկ խաղերուն Հայաստանի մասնակցութեան, ինչպէս նաեւ Փարիզի մէջ գործող «Հայաստանի ողիմպիական տան» մասին:

Արդիւնքները՝ բաւարար

«Ողիմպիական խաղերը մարզական ամենադժուար իրադարձութիւնն են, որ կազմակերպիչներուն համար  կը դառնայ լուրջ փորձութիւն. հեշտ չէ ընդունիլ շուրջ 11 հազար մարզիկ, մեծ թիւով պատուիրակութիւններ, բազմամիլիոն երկրպագուներ: Կարծիքներն ու նախասիրութիւնները կրնան տարբեր ըլլալ, բայց սա ողիմպիական խաղեր են, այստեղ պէտք է խաղաղութիւն տիրէ, քանի որ ի սկզբանէ Ողիմպիական խաղերը ստեղծուած են պատերազմները դադրեցնելու գաղափարին շուրջ: Կազմակերպչական առումով, Փարիզի խաղերը, իմ կարծիքովս, լաւագոյններէն էին: Փարիզը կրցաւ սիրով ընդունիլ ողիմպիականները, եւ վստահ եմ՝ շատերուն համար այս խաղերը պիտի մնան որպէս լաւագոյն յիշողութիւն»,- կ’ըսէ Կարէն Գիլոյեանը:

Անդրադառնալով Հայաստանի մարզիկներուն արձանագրած արդիւնքներուն՝ ԿԳՄՄ նախարարի տեղակալը կը նշէ, որ մեր 15 մարզիկներէն 3-ը, այսպէս կոչուած, «սպիտակ քարտով» կը մասնակցէին Ողիմպիական խաղերուն եւ անոնցմէ մետալներու ակնկալիք չկար, իսկ ընդհանուր արդիւնքները կը գնահատէ բաւարար:

«ՀՀ կառավարութեան որդեգրած քաղաքականութիւնն ու մշակած ռազմավարութիւնը չեն կրնար արագ արդիւնք տալ: Մարմնամարզին մէջ այսօրուան ներդրումը վաղը մետալի չի վերածուիր. անոր համար ժամանակ կը պահանջուի: ՀՀ կառավարութեան կողմէ մարզական ոլորտին մէջ վարուող քաղաքականութեան արդիւնքը այս պահին աւելի տեսանելի է պատանեկան եւ երիտասարդական ախոյեանութիւններուն մէջ՝ դատելով մետալներէն: Վստահ եմ, որ մենք ճիշդ ուղիի վրայ ենք եւ Լոս Անճելըսի Ողիմպիական խաղերուն պիտի ունենանք յստակ յառաջընթաց: Յառաջիկայ մէկ ամսուան ընթացքին պիտի ունենանք մասնագիտական վերլուծութիւններ, քննարկումներ, իսկ յետոյ պիտի աշխատինք ֆետերասիոններուն հետ՝ նախապատրաստուելով յաջորդ խաղերուն»,- կը վստահեցնէ փոխնախարար Գիլոյեանը:

Արթուր Ալեքսանեանի աւարտական գօտեմարտի բողոքարկման ընթացքին մասին

ԿԳՄՄ նախարարի տեղակալը անդրադարձած է նաեւ յունահռոմէական ոճի ըմբիշ Արթուր Ալեքսանեանի՝ իրանցի ըմբիշին հետ աւարտական գօտեմարտի բողոքարկման ընթացքին:

«Ըմբշամարտի միջազգային ֆետերասիոնը գրաւոր պատասխանած է՝ նշելով, որ մրցավարները ճիշդ դատած են:

Հայաստանի ազգային ողիմպիական կոմիտէն, կցելով ֆետերասիոնի բողոքարկումը եւ Ըմբշամարտի միջազգային ֆետերասիոնի պատասխանը, դիմած է Միջազգային ողիմպիական կոմիտէի բողոքարկման յանձնաժողովին: Առաջին արձագանգը հետեւեալն էր՝ «Ի լրումն ուղարկեցէք, թէ որ դրուագին ճշգրիտ ինչը կը բողոքարկուի»: Յառաջիկայ մէկ-երկու օրերուն յաւելեալ փաստեր պիտի ուղարկուին բողոքարկման յանձնաժողով: Մենք ունինք տեսագրութիւններ, ուր նոյն դրուագին համար՝ այլ գօտեմարտի մէջ, գորգէն դուրս եկողը զգուշացուցած են, իսկ հակառակորդին տուած են միաւոր: Այսինքն՝ ունինք փաստ, որ Արթուր Ալեքսանեանի պարագային եղած է ճիշդ հակառակ վերաբերմունք: Աւելի քան վստահ ենք, որ Արթուր Ալեքսանեանը այդ գօտեմարտին մէջ չէր պարտուեր, յատկապէս որ անկէ յետոյ որեւէ միաւոր չէ եղած, որեւէ գործողութիւն չէ եղած: Պիտի պայքարինք մինչեւ վերջ, յոյսեր ունիմ, որ ազնիւ կը գտնուին եւ արդարութիւնը կը վերականգնուի»,- ըսած է Կարէն Գիլոյեանը: