- Աւելի քան երկու շաբաթ շարունակ, 206 ազգային պատուիրակութիւններ՝ ներառեալ անհատական կարգավիճակով մասնակցող ողիմպիական չէզոք մարզիկներու եւ գաղթականներու խումբերը ներկայացնող 10.714 մարզուհի եւ մարզիկ հանդէս եկան 23 մարզաձեւի 48 զանազան մարզախաղերու մէջ:
- Փարիզի ողիմպիականը ներառեց նոր մարզաձեւ մը՝ Breaking եւ 15 նոր մարզախաղեր:
- «Լայն բաց խաղեր» լոզունգով ընթացած ողիմպիականը եզրափակուեցաւ Կիրակի, 11 Օգոստոսին, տեղի ունեցած փակման մեծ հանդիսութեամբ:
- Մրցումները մեծ մասամբ կայացան Փարիզի եւ արուարձանային մարզադաշտերու եւ համալիրներու մէջ:
- Ֆրանսական այլ քաղաքներ հիւրընկալեցին պասքէթպոլի, ֆութպոլի եւ խմբային այլ մարզաձեւերու որոշ խաղեր:
- Նաւարկութեան մրցումները տեղի ունեցան հարաւային Մարսէյ քաղաքին մէջ, իսկ կոհակարշաւը (Surfing)՝ հեռաւոր Խաղաղական ովկիանոսի հարաւային Թահիթիի մէջ, որ Ֆրանսային ենթակայ արտերկրեայ տարածք է, ընդհանուրը 35 մարզադաշտ/համալիր:
- 2024-ի ողիմպիական խաղերուն ընթացքին տեղի ունեցաւ 754 մրցում եւ մետալներու տուչութեան 329 արարողութիւն: Ի վերջոյ, ըստ Ողիմպիական համաշխարհային կոմիտէի պաշտօնական կայքին, Միացեալ Նահանգներ եւ Չինաստան աւարտին ունէին իւրաքանչիւրը 40 ոսկի մետալ, ուստի ամերիկացիները առաջատար համարուեցան, շնորհիւ անոնց մետալներու ընդահնուր գումարինմ(126 մետալ՝ Չինաստանի 91-ին դիմաց):
- Երրորդ դիրքի պայքարն ալ սուր էր Աւստրալիոյ եւ Ճափոնի միջեւ ու վերջին օրը վերջին պահերուն աւարտեցաւ ի նպաստ ճափոնցիներուն, որոնք ստացան 20 ոսկի մետալ, Աւստրալիոյ 18-ին դիմաց: Հիւրընկալ Ֆրանսա եզրափակեց լաւագոյն հնգեակը 16 ոսկիով, իսկ Միացեալ Թագաւորութիւնը 7-րդ էր՝ 14 ոսկիով:
- Հայաստանը գրաւեց մետալներու աղիւսակի 66-րդ դիրքը՝ երեք արծաթ եւ մէկ պրոնզ մետալներով:
- ՄՐՑԱՆԻՇԵՐ
- Մասնակիցներէն 91 երկրի պատուիրակութիւն (ներառեալ տեղահանուած մարզիկներու խումբը) շահեցան մետալներ: Ալպանիա, Քափէ Վերտէ, Տոմինիքա եւ Սէյնթ Լուշա ստացան իրենց ողիմպիական պատմութեան առաջին մետալները, իսկ Պոցուանա, Կուաթեմալա, Տոմինիքա եւ Սէյնթ Լուշա՝ առաջին ոսկիները:
- Մրցանիշերուն առումով, 2024-ի փարիզեան խաղերուն մասնակիցները հատեցին համաշխարհային 32 մրցանիշ՝ 8 մարզախաղի եւ ողիմպիական 125 մրցանիշ՝ 10 մարզախաղի մէջ: Համաշխարհային մրցանիշերէն 12-ը հատեցին հեծելանւորդները, հինգը՝ մարզական մագլցողները, չորսը՝ լողորդները եւ երեքը՝ աթլեթները:
- ԼԱՒԱԳՈՅՆ ՄԱՐԶԻԿՆԵՐ
- Անհատական առաջնութեան ծիրին մէջ, ֆրանսացի լողորդ Լէոն Մարշանտ դարձաւ այս ողիմպիականներուն ամէնէն յաջող մարզիկը՝ ապահովելով 4 ոսկի եւ մէկ պրոնզէ մետալ:
- Չինացի Եուֆայ Ժէնկ շահեցաւ 6 մետալ, սակայն առանց ոսկիի:
- Երրորդ դիրքը գրաւեց ամերիկացի լողորդուհի Թորի Հասք, որ շահեցաւ երեք ոսկի եւ երկու արծաթ:
- ԺԽՏԱԿԱՆ ԵՐԵՒՈՅԹՆԵՐ
- Փարիզ-2024 ողիմպիական խաղերը ականատես դարձան նաեւ շարք մը ժխտական երեւոյթներու: Նախ տարակարծութիւններ յառաջացան ալճերացի բռնցքամարտիկ Իման Խելիֆի սեռին կապակցութեամբ, մինչ ան յաջողեցաւ ապահովել ոսկի մետալ մը:
- Ողիմպիականներուն ընթացքին Փարիզէն տուն ուղարկուեցան փարակուայցի լողորդ Լուանա Ալոնզօն եւ պրազիլցի Անա Քարոլինա Վիերան՝ իրենց ազգային պատուիրակութիւններուն եւ ողիմպիական կացարանին օրէնքները խախտելու յանցանքով, թէեւ կը ժխտեն ամբաստանութիւնները:
ՀԱՅԱՍՏԱՆԸ ՓԱՐԻԶ-2024 ԽԱՂԵՐՈՒՆ
- Հայաստանը Փարիզի ողիմպիական խաղերուն ներկայացաւ 13 մարզիկներով եւ երկու մարզուհիներով եւ մասնակցեցաւ աթլեթիզմի, բռնցքամարտի, մարմնամարզութեան, հրաձգութեան, լողի, ծանրաբարձութեան եւ ըմբշամարտի մրցումներուն:
- Հայաստանի արծաթ մետալները շահեցան Արթուր Ալեքսանեանը (Յունահռոմէական ըմբշամարտ), Արթուր Դաւթեանը (մարմնամարզութիւն) եւ Վարազդատ Լալայեանը (ծանրաբարձրութիւն), իսկ պրոնզէ մետալին տիրացաւ Մալխաս Ամոյեանը (Յունահռոմէական ըմբշամարտ):
