Վերջերս Հայաստանի մէջ Իրանի Իսլամական Հանրապետութեան դեսպան Մեհտի Սոպհանի յայտնեց, որ «Մեր դիրքորոշումը ապաշրջափակման հարցին շատ յստակ է: Մենք կողմնակից ենք ապաշրջափակման, սակայն այդ ապաշրջափակումը պէտք է տեղի ունենայ Հայաստանի ինքնիշխանութեան ներքոյ»:
Այս յայտարարութիւնը կը վերաբերի նախ եւ առաջ Ատրպէյճանի կողմէ առաջ քաշուած «Զանգեզուրի միջանցքի»ն: Իրանի Իսլամական Հանրապետութիւնը միշտ դէմ գտնուած է այդ միջանցքի բացումին, պաշտօնական Թեհրանի այս դիրքորոշումը կրկնելը պատահականութեան ծնունդ չէ, այլ՝ նախ եւ առաջ կը բղխի Իրանի Իսլամական Հանրապետութեան ազգային անվտանգութեան շահերէն ինչպէս նաեւ կը նպաստէ Հայաստանի տարածաշրջանային եւ բանակցային դիրքերու ամրապնդման:
Իրանի նախորդ նախագահ Իպրահիմ Ռայիսիի եւ անոր ընկերակցող բարձրաստիճան պատուիրակութեան Ատրպէյճանէն վերադարձի ճանապարհին առեղծուածային մահէն, եւ Իսլամական Դիմադրութեան Շարժման (ՀԱՄԱՍ) ղեկավար Իսմաիլ Հանիէի Թեհրանի մէջ սպանութենէն ետք, Իրան-Ատրպէյճան լարուածութիւն մը կը նկատուի, մինչեւ իսկ Իրանի նախագահ Փեզեշքիանին մօտիկ շրջանակներէ ձայներ լսուեցան հարուածելու Ատրպէյճանի մէջ տեղակայուած իսրայէլեան դիրքեր:
Շատ հարցումներու նիւթ էր Ռուսաստանի դաշնութեան Անվտանգութեան խորհուրդի քարտուղար Սերկէյ Շոյկույի այցը Պաքու, Իրանէն վերադարձի ճամբուն վրայ: Վերլուծաբաններ կը նկատեն, որ Իրանի իշխանութիւնները յստակ պատգամ մը ղրկած են Իսրայէլի բարեկամ Ալիեւի վարչութեան, որուն բովանդակութիւնը կարելի է ենթադրել, որ՝ «խելօք կեցիր…»:
«Մեր դարաւոր բարեկամ հարեւան Իրան, երբ մենք քու սահմանիդ էինք թիկունքդ ամուր էր…»:
Նշմարեց՝
ՍԱՄՈՒԷԼ ՂԱԶԱՐԵԱՆ
