Առողջապահութեան նախարարութիւնը յայտարարեց, թէ քաղաքացի մը զոհուած է քանի մը օր առաջ ստացած վէրքերուն պատճառով, որ կրած էր հարաւային Պընթ Ժպէյլ գաւառի Պէյթ Լիֆ գիւղի ռմբակոծումէն: Իսկ երէկ իսրայէլեան ուժերը կրակ բացին հարաւարեւելեան Ուազզանի շրջանին ուղղութեամբ, վիրաւորելով հովիւ մը, որ փոխադրուեցաւ մօտակայ Մարժաայունի հիւանդանոցը:
Գրեթէ ամէնօրեայ դարձած երեւոյթով, իսրայէլեան ռազմական օդանաւերը երէկ երեկոյեան ձայնի պատը վերստին հատեցին Պէյրութի եւ հարաւային շրջաններուն վերեւ: Հըզպալլա միւս կողմէ յայտարարեց, թէ մեծաթիւ անօդաչու սարքերով յարձակումներ գործած է իսրայէլեան զօրամասերու վրայ, պատճառելով ծանր վնաս: Հըզպալլա հաղորդագրութեամբ մը մեկնաբանեց նաեւ Կազայի մէջ Իսրայէլի գործած նորագոյն ոճիրները: Ըստ կուսակցութեան, զինադադարին եւ բանակցութիւններուն վերաբերող բոլոր խօսքերը պարզապէս իսրայէլեան սուտեր են:
ԵՈՒՆԻՖԻԼ-ի խաղաղապահ ուժերու բանբեր Անտրէա Թենանթի յայտնեց, որ Լիբանանի մէջ իրենց գլխաւոր առաքելութիւնն է լուծել կապոյտ գիծին շուրջ յայտնուող խնդիրները, վստահեցնելով որ հարցը կարելի է լուծել դիւանագիտական խաղաղ միջոցներով: Իսկ Նիկոսիոյ մէջ ամերիկացի դեսպանը յայտնեց, որ ամերիկան մարտանաւ մը համագործակցական այցելութեամբ ժամանած է Կիպրոս, սակայն զայն անհրաժեշտութեան պարագային կարելի է գործածել Միջին Արեւելքէն քաղաքացիներ տարհանելու համար:
