Հայաստանի ըմբշամարտի ֆետերասիոնը բողոքարկած է Փարիզի ողիմպիական խաղերուն յունահռոմէական ոճի ըմբիշ, 98 քկ քաշային Արթուր Ալեքսանեանի աւարտական մրցամարտին վերաբերեալ, ուր Ալեքսանեանը մրցելով պրոնզէ մետալակիր, Աշխարհի ու Ասիայի ախոյեան, իրանցի Մոհամատհատի Սարաֆիի հետ, 1:4 արդիւնքով զիջած էր մրցակիցին՝ արժանանալով արծաթէ մետալի:
Ոլիմպիական խաղերու ոսկէ, արծաթէ եւ պրոնզէ մետալակիր, աշխարհի քառակի եւ Եւրոպայի եօթակի ախոյեան Արթուր Ալեքսանեանը յոյս յայտնած է, որ արդարութիւնը կը վերականգնուի: Լրագրողներուն հետ իր խօսքին մէջ Արթուր Ալեքսանեան կը պարզաբանէ. «Այստեղ եկած էի ոսկի մետալի համար, բայց բոլորդ տեսաք, թէ ինչ կատարուեցաւ մեր մրցամարտին ժամանակ: Դրուագներէն մէկուն մէջ իրանցի ըմբիշը երկու ոտքով գօտեմարտի տարածքէն լրիւ դուրս եկած էր, ես մարզիչներուն ըսի որ բողոքարկեն: Այդտեղ մէկ միաւոր պէտք էր ինծի տային, բայց փոխարէնը երկու միաւոր տուին իրանցի ըմբիշին, եւս մէկ միաւոր՝ բողոքարկելուս համար: Վստահ եմ՝ այդտեղ մէկ միաւորը ինծի պէտք է տային: Բնաւ լարուածութիւն չունէի, քանի որ սա իմ երրորդ աւարտականն էր եւ չորրորդ ողիմպիական խաղերը: Պարզապէս այսպիսի մրցաշարքերուն, այն ալ՝ աւարտականին, պարզ մանրուքներն անգամ կրնան լուրջ հարցեր լուծել»:
Արդեօք պիտի շարունակէ՞ իր մարզական ասպարէզը թէ՞ ոչ, Ալեքսանեան կը պատասխանէ՝ ըսելով. «Թէեւ մրցավարական կողմնակալութիւններն ու անարդարութիւնները հիասթափեցնող են, սակայն ինք որոշած է մնալ ըմբշամարտին մէջ: Ի դէպ, կողմնակալութեան այլ դէպքեր ալ արձանագրուեցան: Օրինակ Սլավիկ Գալստեանին հետ, մրցավարը անոր յաղթանակը արձանագրելէ ետք ինչ-ինչ պատճառներով գօտեմարտին արդիւնքը փոխուեցաւ եւ Սլավիկը մնաց առանց մետալի: Նոյնն է այսօր Արսէն Յարութիւնեանի պարագան: Այն համոզումը ունիմ, որ մեր հաւաքականին դէմ լարուածութիւն մը կայ: Գիտեմ, որ բողոքներ ներկայացուած են եւ յոյս ունիմ, որ արդարութիւնը կը վերականգնուի»:
