AM իրաւաբանական ընկերութեան փաստաբան, հաշտարար Վանիկ Մարգարեանը, 2023 թուականին մասնակցելով ՀԲԸՄ-ի կողմէ կազմակերպուած «Մտաւոր սեփականութիւնը մշակոյթի ոլորտին մէջ» աշխատաժողին, Ռուբէն Հախվերտեանի հետ հանդիպման ընթացքին տեղեկացուցած էր վերջինիս հանրայայտ շարք մը ձայնագրութիւններու նկատմամբ իրաւունքներու հետ կապուած խնդիրին, ինչի հետեւանքով մեծանուն հայ երգիչն ու հեղինակը հնարաւորութիւն չունէր առցանց հարթակներու վրայ (Spotify, Apple music եւ այլ) տեղադրել իր իսկ երգերը։
Պարզուած էր, որ 1990-ականներուն Ռուբէն Հախվերտեանը իր ձայնասկաւառակները ԱՄՆ-ի մէջ վաճառելու նպատակով անգլերէնով փաստաթուղթ ստորագրած էր՝ չտեղեկանալով, որ այդ փաստաթուղթին համաձայն ձայնագրութիւններուն նկատմամբ բոլոր իրաւունքները, այդ շարքին՝ ապագային հնարաւոր օգտագործման եղանակներով, կը փոխանցուին ձայնագրութիւններուն վաճառքով զբաղող ընկերութեան եւ այդ ընկերութիւնը իր անունով արձանագրած էր իրաւունքները ԱՄՆ-ի մէջ։
AM իրաւաբանական ընկերութեան Pro bono ծրագրի շրջանակներուն մէջ Վանիկ Մարգարեանը անվճար ստանձնեց Ռուբէն Հախվերտեանի շահերուն պաշտպանութիւնը՝ բանակցութիւններ սկսելով իրաւունքները իր անուամբ արձանագրած ամերիկեան ընկերութեան հետ։ Երկարատեւ իրաւական գրագրութեան ու բանակցութիւններու շնորհիւ ստորագրուեցաւ համաձայնագիր, որով ձայնագրութիւններուն նկատմամբ իրաւունքները վերադարձուեցան Ռուբէն Հախվերտեանին, ներառեալ հանրայայտ «Ճակատագիր» (1994), «Կէսգիշեր» (1997), «Սա Երեւանն է» (1997) ալպոմները։
