Լիբանանի մէջ գործող զբօսաշրջային հաստատութիւնները միաւորող սենտիքաներու համախմբումի ընդհանուր քարտուղար Ժան Պէյրութի «գուժեց Լիբանանի զբօսարշրջային խոստումնալից եղանակը, նախքան անոր սկիզբը»: Ան ցաւ յայտնեց, որ ամառնային զբօսաշրջութիւնը արդէն կործանուած է աւելի քան երեք միլիառ տոլարի վնասով: Ըստ Պէյրութիի, պանդոկներու զբաղուածութիւնը նուազած է 20 առ հարիւրի, մինչ նախորդ տարիներու այս ժամանակաշրջանին դատարկ անկողին չէր մնար լիբանանեան զբօսաշրջային հաստատութիւններուն մէջ: Պէյրութի կառավարութենէն պահանջեց անյապաղ ժողով գումարել իրենց հետ եւ որոշումներ կայացնել հաստատութիւններու սեփականատէրներուն կրած վնասը մեղմելու համար:
