Մինչ Լիբանանի, տարածաշրջանի եւ աշխարհի մէջ մարդիկ բազմազան մեկնաբանութիւններով կը փորձեն վերլուծել վերջին օրերու զարգացումները եւ գուշակել գալիք իրադարձութիւնները, Դիմադրութեան ճակատին եւ Իսրայէլի միջեւ կը շարունակուի սպառնալիքներու եւ ամբաստանութիւններու փոխանակումը: Հըզպալլայի երեսփոխաններէն Հըսէյն Ժէշշի շետեց, որ «թշնամին ունի միայն մէկ ընտրանք՝ իսկոյն վերջ տալ Կազայի պատերազմին, այլապէս պէտք է դիմադրութեան հերոսներուն ձեռամբ ենթարկուի յաւելեալ պարտութիւններու եւ խայտառակութեան»: Հըզպալլայի մէկ այլ երեսփոխան Ալի Ֆայյատ շեշտեց, որ իրենք Իսրայէլին պիտի չարտօնեն խախտել առճակատումի հաւասարակշռութեան կարգերը, ինչքան ալ խորանայ պատերազմը: Իսկ Եմէնի մէջ իշխող հուսիներու Անսարալլա կազմակերպութեան ղեկավար Ապտէլ Մալէք Պատր էլ Տին Հուսի բացատրեց, որ Իրանին ու դաշնակիցներուն հակադարձութեան ուշացումը պարզապէս մարտավարութիւն է՝ որպէսզի գալիք հակադարձութիւնը աւելի ծանր ազդէ Իսրայէլին: Հուսի նաեւ վստահեցուց, որ իրենք եւս պիտի հակադարձեն Հուտայտէ նաւահանգիստի վառելանիւթի մթերանոցի ռմբակոծումին: «Իսրայէլեան թշնամին քաջ կը գիտակցի, թէ մեր հակադարձութենէն փախուստ չկայ, ուստի դիմած է պաշտպանական նախապատրաստութիւններու՝ ամերիկեան վերահսկողութեամբ եւ արաբական ու արեւմտեան որոշ ուժերու համագործակցութեամբ», կարծիք յայտնեց Հուսի: Ան իր շաբաթական ուղերձին մէջ նշեց, որ ամերիկացիներն ու եւրոպացիները կը փորձեն համոզել Իրանը, որ թեթեւօրէն հակադարձէ Իսրայէլին: «Իսլամական հանրապետութիւնը բոլոր այդ փորձերը կը դիմագրաւէ յստակութեամբ, որովհետեւ հարցը կը վերաբերի Իրանի պատուոյն եւ արժանապատուութեան», շեշտեց Հուսի:
Միւս կողմէ, Իսրայէլի վարչապետ Պենիամին Նեթանիահու Հըզպալլային կոչ ուղղեց «կրկնակի մտածելու, նախքան Իսրայէլի դէմ որեւէ յարձակում գործելը»: Նեթանիահու դիտել տուաւ, որ Կազայի պատերազմին տարածաշրջանային ընդարձակումը արկածախնդրութիւն մըն է, որուն բեռը կը գիտակցի, սակայն պատրաստ է զայն մղելու: «Մենք կը դիմագրաւենք ոչ միայն «Համաս» շարժումը, այլ Իրանի ամբողջական ճակատը, ուստի պէտք է ինքնակազմակերպուինք եւ պաշտպանուինք», ըսաւ Նեթանիահու, վերստին նշելով, որ Կազայի մէջ իրենց նպատակն է այնպէս հարուածել «Համաս»ը, որ այլեւս կարողութիւն չունենայ վտանգ սպառնալու Իսրայէլին:
