Հայաստանի Արտաքին գործերու նախարարութիւնը պատասխանեց «Զանգեզուրի միջանցքի» մասին վերջերս ատրպէյճանական կողմէն հնչած յայտարարութիւններուն, ուր կը նշուէր, թէ համաձայնութիւն գոյացած է հաղորդակցութիւններու վերաբացումի կէտը դուրս բերել ներկայի օրակարգէն եւ զայն քննարկել աւելի ուշ: Երեւան սակայն յստակացուց, որ ատրպէյճանական կողմին հետ կնքուած այս համաձայնութեամբ հանդերձ, հաղորդակցութիւններու ապաշրջափակումը կը մնայ խաղաղութեան կարեւոր մաս, իսկ Երեւանի դիրքորոշումները յստակ են խաղաղութեան խաչմերուկ ծրագրին մէջ՝ հիմնուած ինքնիշխանութեան, իրաւազօրութեան, փոխադարձութեան եւ հաւասարութեան վրայ:
