Երէկ իսրայէլեան անօդաչու սարք մը ռմբակոծեց Պէյրութի հարաւային արուարձանին մէջ գտնուող Հըզպալլայի ղեկավարներէն Ֆուատ Շուքըրի բնակարանը: Շուքըր հրթիռային ջոկատի հրամանատարն է: Ըստ տեղեկութիւններու, չորս յարկանի շէնքը փուլ եկած է: Այս հարուածը կը համարուի պատասխան այն ռմբակոծումին, որուն ենթարկուեցաւ գրաւեալ Կոլանի բարձրաւանդակի Մաժտալ Շամս գիւղաքաղաքը: Զոհ գացին տասնեակ մը երեխաներ: Ըստ տեղեկութիւններու, Հըզպալլա ուղղակիօրէն պիտի չհակադարձէ այս յարձակումին, այլ պիտի առնէ իր ժամանակը ճիշդ հարուածը հասցնելու համար: Հըզպալլա յայտարարեց, թէ մահափորձը ձախողած էր:
