Սահմանադրական դատարանը մասամբ բաւարարած է Վճռաբեկ դատարանի դիմումը:
Վճռաբեկը Մարտի 1-ի վարոյթով անցնող 2-րդ նախագահ Ռոպերթ Քոչարեանի, Սէյրան Օհանեանի, Եուրի Խաչատուրովի եւ Արմէն Գէորգեանի գործով դիմած էր Բարձր դատարան՝ միջնորդելով որոշել Քրէական դատավարութեան օրէնսգիրքի շարք մը յօդուածներու Սահմանադրութեան համապատասխանելու հարցը:
Խնդիրը 1998-ին ընդունուած, այժմ մասնակի գործող Քրէական դատավարութեան օրէնսգիրքի 309.1 յօդուածի 3-րդ մասն էր, որ հնարաւորութիւն չէր տար յօդուածը հակասահմանադրական ճանչնալէ յետոյ դատարանին մէջ վերաորակել մեղադրանքը:
Բարձր դատարանը որոշած է, որ թէեւ յօդուածը կը համապատասխանէ Սահմանադրութեան, այն մեկնաբանութեամբ, որ ամբաստանեալին մեղսագրուող արարքը հակասահմանադրական ճանչցուելով մեղադրողը կրնայ մինչեւ դատարանի խորհրդակցական սենեակ հեռանալը փոխել ամբաստանեալին առաջադրուած մեղադրանքը մեղադրեալի արարքին մէջ քրէական օրէնքով նախատեսուած այլ արարքի յատկանիշերու առկայութեան պարագային՝ անկախ դատական քննութեան ընթացքին ապացոյցներու հետազօտումէն:
Սա կը նշանակէ, որ Քոչարեանին եւ նախկին բարձրաստիճան պաշտօնեաներուն ներկայացուած մեղադրանքը պէտք է վերաորակել:
Վճռաբեկի դիմումին միւս մասը մերժուած է։
2021 թուականի Մարտ 26-ին ՍԴ-ն որոշած էր, որ ՀՀ Քրէական օրէնսգիրքի 300.1-րդ յօդուածը (սահմանադրական կարգը տապալելը), որով կը մեղադրուէին Ռոպերթ Քոչարեանը եւ միւսները, չի համապատասխաներ Սահմանադրութեան, որմէ յետոյ անոնց նկատմամբ քրէական հետապնդումը դադրեցուած էր, քանի որ դատախազութիւնը չէր կրնար վերաորակաւորել մեղադրանքը։
