Վրաստանի արտաքին գործերու նախարար Իլիա Տարչիաշվիլին յայտնած է, որ Թիֆլիսն ու Երեւանը մեծապէս կ՛աջակցին եւ կը յարգեն իրար տարածքային ամբողջականութիւնն ու ինքնիշխանութիւնը։
Վրացի պաշտօնեան այս մասին յայտնած է Հայաստանի արտաքին գործերու նախարար Արարատ Միրզոյեանի հետ համատեղ մամուլի ասուլիսի ընթացքին։
Վրացի նախարարը նշած է, որ Երեւանն ու Թիֆլիսը ունին առանձնայատուկ բարեկամական եւ բարիդրացիական յարաբերութիւններ, որոնք երկար դարերու պատմութիւն ունին։ Ան վստահութիւն յայտնած է, որ Արարատ Միրզոյեանի այցը Վրաստան նոր լիցք կը հաղորդէ երկկողմ յարաբերութիւններուն։
«Հարկ է նշել, որ ռազմավարական գործընկերութեան հռչակագրի ստորագրմամբ՝ մեր երկկողմ համագործակցութիւնը որակապէս նոր մակարդակի անցած է։ Այս նոր փուլը շրջադարձային էր մեր բազմակողմ համագործակցութեան մէջ»,- ընդգծած է Տարչիաշվիլին։
Վերջինս նաեւ շնորհակալութիւն յայտնած է հայ գործընկերոջը ՄԱԿ-ի Գլխաւոր վեհաժողովին ընդունած բանաձեւին կողմ քուէարկելու համար, որ կը հաստատէ բոլոր ներքին տեղահանուածներուն, փախստականներուն՝ Ապխազիա եւ Հարաւային Օսեթիա վերադառնալու իրաւունքը։
«Վրաստանը եւ Հայաստանը մեծապէս կ՛աջակցին եւ կը յարգեն իրար տարածքային ամբողջականութիւնը եւ ինքնիշխանութիւնը»,- իր խօսքին մէջ ընդգծած է Վրաստանի արտաքին գործերու նախարարը՝ տեղեկացնելով, որ հայ գործընկերոջ հետ քննարկած է երկու երկիրներուն միջեւ բազմաոլորտ համագործակցութեան հետ կապուած հարցեր։
Ան յաւելած է, որ Հայաստանը Վրաստանի առեւտրային գործընկերներու տասնեակին մէջ է, իսկ զբօսաշրջութեան առումով՝ եռեակին մէջ։
