Պաղեստինեան «Ժիհատ Իսլամի» շարժումի զինեալ թեւ «Սարայա Ալ Քուտս» յայտարարեց, թէ Կազայի հարաւային սահմանին վրայ ծանր ականանետերով թիրախ դարձուցած են զրահապատ կառքերու շարասիւն մը:
Անոնք նաեւ թիրախ դարձուցած էին Կազայի իսրայէլեան ընդհանուր հրամանատարութեան կեդրոնը Ռահիմ շրջանին մէջ:
«Համաս»ի զինեալ թեւ «Ալ Քասսամ» գումարտակը յայտարարեց, թէ Ռաֆահի գաղթակայանի շրջանին մէջ «Եասին 105» հակազրահապատ հրթիռով թիրախ դարձուցած է իսրայէլեան «Միրքավա» հրասայլ մը:
Կազայի մէջ գործող պաղեստինեան իշխանութեան առողջապահութեան աղբիւրներ յայտարարեցին, թէ 7 Հոկտեմբեր 2023-էն ի վեր զոհերու թիւը հասաւ 36.731-ի, իսկ վիրաւորներուն թիւը՝ 83.530-ի: Վերջին 24 ժամերուն Իսրայէլ գործադրած է 8 սպանդ, որուն զոհ գացած են 77 անձ ու վիրաւորուած են 221 անձ:
