Աշխարհահռչակ երգիչ Շարլ Ազնաւուրի հարիւրամեայ յոբելեանը Երեւանը տօնեց գեղեցիկ համերգային ծրագրով, որ տեղի ունեցաւ 22 Մայիսին, Քասքատի մէջ (Գաֆէսճէան քանդակներու պարտէզ):
«Երեւանը Ազնաւուր կը լսէ» խորագրով երեկոյին Գոռ Սուջեանի, Էրիկ Կարապետեանի, Սիւզաննա Մելքոնեանի եւ Լիպարիտ Աւետիսեանի կատարմամբ հնչեցին Ազնաւուրի սիրուած ստեղծագործութիւնները, որ կը պատմեն սիրոյ, յուսալքութեան, կանանց նկատմամբ մեծ ակնածանքի եւ մարդկային այլ զգացմունքներու մասին:
Արուեստագէտները ելոյթ ունեցան Հայաստանի պետական սիմֆոնիկ նուագախումբին նուագակցութեամբ` գեղարուեստական ղեկավար եւ գլխաւոր խմբավար Սերկէյ Սմբատեան: Երեկոյին սպասուած հիւրն էր ֆրանսացի դաշնակահար Էրիք Պերշօն, որ տարիներ շարունակ նուագակցած է երգիչին: Էրիք Պերշոյի ելոյթով մեկնարկեց համերգը:
Երեկոյին դժուար էր տեղաշարժ կատարել, քանի որ Քասքատը լեփ-լեցուն էր երգիչին երկրպագուներով, որոնց շարքերուն մէջ հայերէն բացի շատ էին նաեւ օտարազգիները, ինչ որ եւս մէկ անգամ կը խօսի այն մասին, որ Ազնաւուրի արուեստը համամարդկային է եւ չունի սահմաններ:
«Ազնաւուրը արուեստագէտ էր, որ փոխեց մեր պատկերացումները մեր տաղանդին մասին, փոխեց աշխարհընկալումը Հայաստանի, հայերու, մեր պատմութեան մասին»,- կը նշէ Սերկէյ Սմբատեանը: Ըստ անոր` տաղանդին շնորհիւ Ազնաւուրը կրցաւ նոյնիսկ ջերմացնել ու մտերմացնել երկիրները, ժողովուրդները:
խմբավարը կը կարծէ, որ` նման արուեստագէտի ժառանգութիւնը, ուժը, տաղանդը հնարաւորութիւն կու տան աշխարհին ներկայանալ այլ ձեւաչափով, որովհետեւ Ազնաւուրը աւելի մեծ է, քան այն ժանրը, որով ստեղծագործած է. ան կրցաւ երգով հատել բոլոր կարմիր գիծերը եւ ցոյց տալ ժանրի հնարաւորութիւնները:
Հայաստանի պետական սիմֆոնիկ նուագախումբը ոգեւորութեամբ Ազնաւուր կը կատարէ, քանի որ երգիչը ե՛ւ Հայաստանինն է, եւ՛ աշխարհինը: «Ան դուրս է ակադեմական, դասական ձեւաչափէն: Լայն բազմութիւնը կը ճանչնայ Շարլի երաժշտութիւնը»,- կ՛ըսէ Սմբատեանը:
Համերգը կազմակերպած էր «Ազնաւուր» հիմնադրամը` համագործակցելով ՀՀ կրթութեան, գիտութեան, մշակոյթի եւ մարմնամարզի նախարարութեան, Երեւանի քաղաքապետարանին հետ:
