«Տաւուշը յանուն հայրենիքի» ընդդիմադիր շարժումի ղեկավար Բագրատ Արք. Գալստանեան երէկ տեսակցեցաւ տնտեսագէտներու, կրթութեան եւ գիտութեան ոլորտներու խումբ մը մասնագէտներու հետ, ապա Սուրբ Աննա եկեղեցւոյ շրջափակին մէջ ամփոփեց օրը: Ան իրաւապահ համակարգին կոչ ուղղեց արձագանգելու իշխող Քաղաքացիական պայմանագիր կուսակցութեան պատասխանատուներու ելոյթներուն: Նախկին նախագահ Սերժ Սարգսեան եւս մասնակցեցաւ Բագրատ Սրբազանի շարժումներուն եւ յայտարարեց, թէ ամէն ինչի պատրաստ է, որպէսզի շարժումը յաջողի եւ հասնի իշխանափոխութեան:
Իսկ երէկ յետմիջօրէի ժամերէն սկսեալ Երեւանի մէջ գործադուլ յայտարարեցին հանրային փոխադրակառքերու վարորդները՝ անդամալուծելով ամբողջ քաղաքը, ուր գործերէն արձակուած հազարաւոր քաղաքացիներ երկար ժամանակ ի զուր սպասեցին զիրենք տուն փոխադրող հանրակառքերը:
