«Փոլիթիքօ» թերթին մէջ 10 Մայիսին լոյս տեսած յօդուածով մը, Միջազգային քրէական դատարանի առաջին գլխաւոր դատախազ Լուիս Մորենօ Օքամփօ կոչ կ՛ընէ այդ ատեանին, որ անյապաղ ընդունէ անցեալ ամիս Արդարութեան եւ մարդկային իրաւունքներու կեդրոնին (CFTJ) այն դիմումը, որ հայութեան դէմ ցեղասպանութիւն գործադրելու յանցանքով կ՛ամբաստանէ Ատրպէյճանի նախագահ Իլհամ Ալիեւը, յստակացնելով որ Ալիեւի ծրագիր ոչ միայն Արցախի հայութեան դէմ ցեղասպանական արարք մըն է, այլ նաւ թիրախ ունի նաեւ Հայաստանի հայութիւնը։
Օքամփօ կը մանրամասնէ, թէ Գալիֆորնիոյ Օրէնճ գաւառի Գերագոյն ատեանի դատաւոր Կասիա Աբգարեանի գլխաւորութեամբ ներկայացուած ծաւալուն դիմումին մէջ ներկայացուած են Ալիեւի ցեղասպանական դիտաւորութիւններուն մասին բացայայտ փաստեր, սկսելով ատելութիւն հրահրող անոր յայտարարութիւններէն ու հասնելով մինչեւ անոր հակահայ սպառնալիքները եւ ռազմական գործողութիւնները, որոնք բռնի տեղահանութեան մղեցին 120.000 արցախահայեր։
Օքամփօ նաեւ տեղեկութիւններ կը փոխանցէ Պաքուի հակահայ քաղաքականութեան, Արցախի պատերազմին ընթացքին արձանագրուած պատերազմական ոճիրներուն եւ մարդկային իրաւունքներու ոտնահարումներուն մասին, որոնց պատճառով Արցախի բնիկ ժողովուրդը բռնի կերպով տեղահանուեցաւ։ Ան կ՛աւելցնէ, որ Արդարութեան եւ մարդկային իրաւունքներու կեդրոնին կողմէ ներկայացուած դիմումին մէջ նաեւ կը շեշտուի, որ Ալիեւ այժմ նոյնը կը փորձէ իրականացել այս անգամ Հայաստանի Գեղարքունիք, Սիւնիք, Վայոց Ձոր ու Արարատ մարզերուն մէջ, ուրկէ արդէն իսկ հազարաւոր հայեր հեռացած են։
Օքամփօ կը յիշեցնէ, որ Պաքու ոչ միայն «Զանգեզուրի միջանացք»ը կը փորձէ ապահովել, այլ ամբողջ Հայաստանը սկսած է կոչել «Արեւմտեան Ատրպէյճան», պնդելով որ այդ տարածքները եւս ատրպէյճանական եղած են։
Յօդուածը եզրակացնելով, ան ցաւ կը յայտնէ, որ հակառակ այս բոլորին, Պրիւքսէլ կը շարունակէ «կարեւոր գործընկեր» նկատել Պաքուն։
