Հայաստանի Հանրապետութեան վարչապետ Նիկոլ Փաշինեան յայտարարեց, թէ ժամանակը յարմար է Ատրպէյճանի հետ բոլոր համաձայնութիւնները ընդգրկելու խաղաղութեան համաձայնագրին մէջ ու ստորագրելու զայն: Այս յայտարարութիւնը ան կատարած է Դանիոյ մայրաքաղաք Քոփընհակընի մէջ տեղի ունեցած Ժողովրդավարութեան գագաթաժողովին: Ըստ վարչապետ Փաշինեանի, խաղաղութիւնը ժողովրդավարութեան հիմնական ուղեկիցն է:
Սահմանագծումը որ սկսաւ Ատրպէյճանի հետ, համաձայնագրի ստորագրութեան պատրաստող հիմնական քայլերէն մէկն է: Հայաստանի կողմէ առաջարկուած «Խաղաղութեան խաչմերուկ» նախագիծին նպատակն է բանալ բոլոր ճանապարհները եւ թոյլ տալ որ հարաւային Կովկասի շրջանը մտնէ տնտեսական կայուն զարգացումի փուլ: Ճամբաները պիտի բացուին յարգելով երկիրներու գերիշխանութիւնը իրենց հողամասին վրայ:
