Երէկ Կազայի հատուածին մէջ շարունակուեցան մարտական ծանր գործողութիւնները պաղեստինցի զինեալներու եւ իսրայէլեան ուժերու միջեւ: Իսրայէլեան կողմը, ըստ վերջին տուեալներուն, սկսած է կորսնցնել մեծ թիւով զինուորներ: Ըստ իսրայէլեան աղբիւրներու, վերջին 24 ժամերուն իսրայէլեան կողմը ունեցած է 22 վիրաւոր, որոնցմէ 15-ը Կազայի մէջ տեղի ունեցած գործողութիւններու ընթացքին: Ծանր մարտեր տեղի կ’ունենան հարաւային Ռաֆահ քաղաքի արեւելեան թաղամասին մէջ, ուր իսրայէլեան ուժեր կը փորձեն ճեղքել պաղեստինեան ուժերու պաշտպանութեան օղակը:
Պաղեստինեան «Համաս» շարժումի մարտական թեւ «Ալ Քասսամ» գումարտակը յայտարարեց, թէ նախօրօք ականուած բնակարան մը պայթեցուց, երբ իսրայէլացի զինուորներ մուտք գործեցին: Կան բազմաթիւ մեռեալներ ու վիրաւորներ: Միւս կողմէն, «Ժիհատ Իսլամի» կազմակերպութեան «Սարայա Ալ Քուտս» մարտական թեւը յայտարարեց, թէ ծանր տրամաչափի ականանետերով ռմբակոծած է իսրայէլեան ուժերու խմբաւորումներ Ռաֆահ քաղաքի արեւելեան հատուածին մէջ: Դիպուկահարի մը գնդակով ինկած է նաեւ իսրայէլացի զինուոր մը հիւսիսային Կազայի Ժապալիա շրջանին մէջ: Նոյն ուժերը 60 միլլիմեթր տրամաչափի ականանետերով ռմբակոծած են իսրայէլեան ուժերու խմբաւորումներ Ռաֆահ քաղաքի արեւելեան հատուածին մէջ:
