Հայաստանի Հանրապետութեան նախագահ Վահագն Խաչատուրեան Լոս Անճելըսի իր կեցավայրին մէջ ընդունած է Սոցիալ Դեմոկրատ Հնչակեան Կուսակցութեան Կեդրոնական վարչութեան անդամները՝ ատենապետ Համբիկ Սարաֆեանի գլխաւորութեամբ:
Ողջունելով հիւրերը՝ նախագահ Խաչատուրեան շնորհակալութիւն յայտնած է կուսակցութեան ներկայացուցիչներուն համազգային նշանակութիւն ունեցող գործընթացներուն մէջ անոնց կատարած աշխատանքին եւ ներդրած ջանքերուն համար:
Հանդիպման ընթացքին անդրադարձ կատարուած է տարածաշրջանային ընդհանուր իրողութիւններուն եւ զարգացումներուն, ինչպէս նաեւ հայաստանեան ներքաղաքական եւ հասարակական կեանքին մէջ տեղի ունեցող գործընթացներուն:
Վահագն Խաչատուրեանը, պատասխանելով հանդիպման մասնակիցներու հարցումներուն, մանրամասնութիւններ յայտնած է Հայաստանի եւ Ատրպէյճանի միջեւ ընթացող սահմանազատման գործընթացին վերաբերեալ՝ ընդգծելով, որ սահմանազատումը կ՛իրականացուի երկու երկիրներուն միջեւ յարաբերութիւններու կարգաւորման եւ խաղաղութեան հասնելու, ինչպէս նաեւ տարածքային ամբողջականութեան անխաթարութեան սկզբունքներու շրջանակին մէջ:
Նախագահը ընդգծած է, որ հայաստանեան իշխանութիւնը անհրաժեշտ քաղաքական կամք ունի յստակօրէն շարժելու հարեւաններուն հետ բարիդրացիական եւ կարգաւորուած յարաբերութիւններ հաստատելու ուղիով:
Զրոյցի ընթացքին անդրադարձ կատարուած է Հայաստանի եւ Միացեալ Նահանգներու միջեւ համագործակցութեան օրակարգային հարցերուն, ինչպէս նաեւ Հայաստան-Սփիւռք կապերու ամրապնդման եւ առկայ խնդիրներու չէզոքացման ուղղութեամբ անհրաժեշտ քայլերու խթանման կարեւորութեան:
Անմիջական մթնոլորտի մէջ Հանրապետութեան նախագահը մանրամասնութիւններ ներկայացուցած է Հայաստանի տնտեսութեան, ռազմարդիւնաբերութեան, երկրի պաշտպանական կարողութիւններու ընդլայնման, տնտեսութեան բազմազանեցման եւ այլ ուղղութիւններով իրականացուող միջոցառումներուն մասին:
Միտքեր փոխանակուած են ներհայաստանեան հասարակական-քաղաքական զարգացումներու պատճառահետեւանքային կապերու, տարածաշրջանային եւ աշխարհաքաղաքական իրողութիւններու փոխազդեցութիւններուն վերաբերեալ:
Հանդիպման աւարտին ՍԴՀԿ ներկայացուցիչները կրկին վստահեցուցած են, որ կուսակցութիւնը իր կարողութիւններով պատրաստ է աջակցելու Հայաստանի պետականութեան ամրապնդման ու երկրի օրակարգային հարցերու սպասարկման:
