ՀՀ տնտեսութեան նախարար Գէորգ Պապոյեանը եւ նախարարի տեղակալ Նարեկ Յովակիմեանը ԱՄՆ Միչիկըն նահանգի Տիթրոյթ քաղաքին մէջ մասնակցած են «Ամերիկեան երկիրներու մրցունակութեան փոխանակում» (ACE) ծրագրին։
Միջոցառման եզրափակիչ մասով Հայաստանը պաշտօնապէս յայտարարուած է որպէս ծրագրի յաջորդ հիւրընկալող երկիր։ Նշենք, որ Հայաստանը, որպէս դիտորդ, երրորդ երկիրն է ԱՄՆ ցամաքամասէն դուրս, ուր պիտի իրականացուի այս ծրագիրը։
Տնտեսութեան նախարար Գէորգ Պապոյեան, ողջունելով միջոցառման մասնակիցները, մեծապէս կարեւորած է Միացեալ Նահանգներու, ինչպէս նաեւ ամերիկեան տարածաշրջանի այլ երկիրներու հետ յարաբերութիւններուն ամրապնդումն ու համագործակցութեան նոր հնարաւորութիւններու բացայայտումը ինչպէս պետական, այնպէս ալ մասնաւոր եւ կրթական ոլորտներուն համար։ Նախարարը նաեւ ընդգծած է Հայաստանի տնտեսութեան բազմազանեցման կարեւորութիւնը եւ այդ ուղղութեամբ իրականացուելիք աշխատանքները։
«Ամերիկեան պետութիւններու մրցունակութեան փոխանակում» ծրագիրը Ամերիկայի տնտեսական զարգացման, նորարարությեան եւ ձեռնարկատիրական կարեւորագոյն միջոցառումներէն մէկն է, որուն կը մասնակցին Ամերիկեան պետութիւններու կազմակերպութեան անդամ եւ դիտորդ բոլոր երկիրները: Ծրագիրը կը համախմբէ անդամ եւ դիտորդ երկիրներու մինչեւ 50 բարձրաստիճան պաշտօնեայի, առեւտրական, քաղաքացիական հասարակութեան եւ գիտակրթական շրջանակներու ներկայացուցիչները։
Ծրագիրը Հայաստանի մէջ կայացնելու բերումով պիտի ստեղծուին նոր գործարար կապեր եւ լուրջ նախադրեալներ՝ Հիւսիսային եւ Հարաւային Ամերիկայի, ինչպէս նաեւ կազմակերպութեան մշտական դիտորդ հանդիսացող պետութիւններուն հետ տնտեսական եւ առեւտրային փոխշահաւէտ յարաբերութիւններու հաստատման համար, ինչ որ, իր հերթին, պիտի նպաստէ հանրային եւ մասնաւոր հատուածներու փոխգործակցութեան, դրամագլուխային ներդրումներու ներգրաւման ու կրթական հաստատութիւններուն միջեւ համագործակցութեան հաստատման։
