ՄՄԱՐՏԱԿԱՆ ԳՈՐԾՈՂՈՒԹԻՒՆՆԵՐ ԿԱԶԱՅԻ ՄԷՋ
Պաղեստինեան «Համաս» կազմակերպութեան «Ալ Քասսամ» զինեալ գումարտակը հրապարակեց տեսերիզ մը, ուր հակազրահապատ հրթիռներով յարձակում կը գործեն իսրայէլեան ուժերուն վրայ, Ռաֆահ քաղաքի արեւելեան մասին մէջ: Իսրայէլեան բանակը յայտարարեց, թէ չորս զինուորներ սպաննուեցան ու երկու զինուորներ վիրաւորուեցան «Նահալ» ջոկատայիններու գումարտակէն Կազայի տարբեր հատուածներու մէջ:
Միւս կողմէն, «Ալ Քասսամ» յայտարարեց, թէ քանի մը օր առաջ փրկած է կեանքը իսրայէլացի գերիի մը, որ փորձեց անձնասպան ըլլալ: Շարժումը վարչապետ Պենիամին Նեթանիահուն պատասխանատու համարեց գերիներու կեանքին համար, որովհետեւ անոնցմէ շատ մը անձեր կը գտնուին հոգեկան ու ֆիզիքական ծանր պայմաններու մէջ:
