Հայաստանի Հանրապետութիւնը պիտի չմասնակցի ՀԱՊԿ գործունէութեան ֆինանսաւորման: Այս մասին յայտնած է ՀՀ Արտաքին գործերու նախարարութեան մամուլի խօսնակ Անի Բադալեանը։
«Հայաստանի Հանրապետութիւնը ձեռնպահ կը մնայ «Հաւաքական անվտանգութեան մասին պայմանագրի կազմակերպութեան 2024թ. պիւտճէի մասին» ՀԱՊԿ հաւաքական անվտանգութեան խորհուրդի՝ 2023թ. Նոյեմբեր 23-ի որոշման միանալէն եւ անով նախատեսուած՝ կազմակերպութեան գործունէութեան ֆինանսաւորման մասնակցելէ, միաժամանակ՝ չառարկելով տուեալ որոշման՝ սահմանափակ ձեւաչափով ընդունման»,- յայտնեց խօսնակը։ Ռուսաստանի նախագահի օգնական Եուրի Ուշաքովը աւելի վաղ ըսած էր, որ Հայաստանը կը պատրաստուի ձեռնպահ մնալու ՀԱՊԿ-ի ֆինանսաւորումէն։ Նշենք, որ Հայաստանը թէեւ դուրս չէ եկած ՀԱՊԿ-էն, սակայն չի մասնակցիր կառոյցի աշխատանքներուն, այդ շարքին՝ համատեղ զօրավարժութիւններուն։
Նիկոլ Փաշինեանը երկրի թիւ մէկ քաղաքական ամպիոնէն յայտարարած է, որ ՀԱՊԿ-ը տէ իւրէ կը հրաժարի արձանագրելէ իր պատասխանատուութեան գօտին Հայաստանի մէջ եւ պատշաճ չէ արձագանգած ՀՀ անվտանգային մարտահրաւէրներուն, աւելին՝ Հայաստանի համար անվտանգային խնդիրներ յառաջացուցած է։
Վերջերս ան նաեւ յայտնած է, որ Հայաստանը տէ ֆաքթօ սառեցուցած է անդամակցութիւնը ՀԱՊԿ-ին։ Յաւելենք, որ շուրջ կէս տարուայ դադարէ յետոյ Փաշինյեան կը հանդիպի Ռուսաստանի նախագահ Վլատիմիր Փութինի հետ։ Փորձագէտները չեն բացառեր, որ հանդիպման օրակարգին վրայ կրնայ ըլլալ նաեւ ՀԱՊԿ-ին Հայաստանի անդամակցութեան հարցը։
