Հայաստանի Հանրապետութեան կրթութեան, գիտութեան, մշակոյթի եւ մարմնամարզի նախարարի տեղակալ Արթուր Մարտիրոսեանը հանդիպած է Վենետիկի յանձնաժողովի եւ Եւրոպայի խորհուրդի մարդու իրաւունքներու եւ իրաւունքի գերակայութեան գլխաւոր տնօրինութեան պատուիրակութեան հետ, որ գլխաւորած է Վենետիկի յանձնաժողովի անդամ Վերոնիքա Պիլքովան (Չեխիա):
Հանդիպման առանցքին «Ազգային փոքրամասնութիւններու մասին» օրէնքի նախագիծին վերաբերեալ քննարկումն էր:
ԿԳՄՄ նախարարի տեղակալ Արթուր Մարտիրոսեանը ողջունած է պատուիրակութեան անդամները եւ նշած, որ Հայաստանի կառավարութիւնը կը կարեւորէ միջազգային կառոյցներուն հետ համագործակցութիւնը. «Հայաստանի Հանրապետութիւնը խստօրէն կը հետեւի միջազգային բոլոր օրէնքներուն, այդ շարքին՝ ազգային փոքրամասնութիւններու կրթութեան եւ մշակութային կեանքին վերաբերող իրաւունքներուն»:
Կողմերը անդրադարձած են «Ազգային փոքրամասնութիւններու մասին» օրէնքի նախագիծի մշակման գործընթացին եւ անոր մէջ ԿԳՄՄ նախարարութեան մասնակցութեան ու ներկայացուցած առաջարկներուն: Վենետիկի յանձնաժողովի պատուիրակութեան տեղեկացուած է, որ ԿԳՄՄ նախարարութիւնը մասնակցած է օրէնքի նախագիծին՝ ազգային փոքրամասնութիւններու կրթութեան իրաւունքին նուիրուած յօդուածի մշակման: Արթուր Մարտիրոսեանի դիտարկմամբ՝ յօդուածը թէեւ ծաւալուն չէ, բայց առանցքային նշանակութիւն ունի ամբողջ օրէնքի ծիրին մէջ:
Փոխնախարարը ներկայացուցած է լրացուցիչ տեղեկութիւն նշուած յօդուածի առանձին կէտերու վերաբերեալ, մասնաւորապէս՝ ուսուցման լեզուի ընտրութեան, առարկայական ծրագրերու մշակման, դասագիրքերու հրատարակման, ուսուցիչներու պատրաստման, միջին մասնագիտական եւ բարձրագոյն ուսումնական հաստատութիւններ ընդունելութեան կարգերի վերաբերեալ:
Հանդիպման ընթացքին քննարկուած են երկուստէք հետաքրքրութիւն ներկայացնող շարք մը հարցեր:
