Եւրոմիութեան արտաքին եւ անվտանգութեան քաղաքականութեան գերագոյն ներկայացուցիչ Ժոզեփ Պորել յայտարարեց, որ Եւրոմիութեան անդամ պետութիւններուն արտաքին գործերու նախարարները որոշած են ընդարձակել Թեհրանի նկատմամբ սահմանուած պատժամիջոցները` առ ի հակադարձութիւն իսրայէլեան թիրախներու դէմ քանի մը օր առաջ գործուած հրթիռային լայնածաւալ յարձակումին:
Իսկ Իրանի Արտաքին գործերու նախարարութեան բանբեր Նասէր Քանաանի հրապարակեց Թեհրանի որդեգրած քայլերը` Դամասկոսի մէջ Իրանի հիւպատոսարանի կործանումէն ետք: Ան նշեց, որ նախ փորձ կատարուած է իսրայէլեան նշեալ գործողութեան հարցին լուծումը գտնել դիւանագիտական միջոցներով` դիմելով ՄԱԿ-ին եւ միջազգային այլ կազմակերպութիւններու: «Սակայն, երբ Միացեալ Նահանգներ, Բրիտանիա եւ Ֆրանսա միջամտելով խափանեցին Ապահովութեան խորհուրդէն Իսրայէլը դատապատրտող որոշումներու հրապարակումը, մենք ստիպուեցանք ռազմական միջոցներով հակադարձել», բացատրեց Քանաանի՝ աւելցնելով, որ Իրան թիրախաւորած է իսրայէլեան զինուորական դիրքեր: Իրանցի բանբերը նշեց, որ տարածաշրջանի անկայունութեան պատճառը Իսրայէլն է, որ կը շարունակէ յարձակիլ պաղեստինցիներուն վրայ: «Առանց ամերիկեան անսահման աջակցութեան, Իսրայէլի ղեկավարութիւնը պիտի չյանդգնէր երթալ այս ծայրայեղութեան», նշեց Թեհրան:
Իսրայէլի նախկին վարչապետ Էհուտ Օլմարթ կարծիք յայտնեց, որ Իրանի յարձակումին հակադարձելու որոշումը Կազայի պատերազմի սկիզբէն ի վեր Իսրայէլի կառավարութեան մեծագոյն իրագործումն է: «Առանց այլ կողմերու աջակցութեան, մենք հնարաւորութիւն պիտի ունենայինք կործանել Իրանի արձակած հրթիռներուն 75 առ հարիւրը, իսկ մնացեալ 25 առ հարիւրը պիտի հասնէին իրենց թիրախներուն եւ ստեղծէին նոր իրողութիւն մը», ըսաւ Օլմարթ եւ գործնականօրէն հաստատեց, որ այլ երկիրներ եւս մասնակցած էին Իրանի հրթիռները զսպելու աշխատանքին:
