Լիբանանեան ուժեր կուսակցութեան նախագահ Սամիր Ժաաժաա մեկնաբանեց քաղաքապետական ընտրութիւնները յետաձգելու մտադրութիւնը եւ առաջարկեց ընտրութիւնը կատարել լիբանանեան բոլոր շրջաններուն մէջ, բացի հարաւէն եւ այնտեղ ուղղուիլ աւելի ուշ` իրավիճակը կայունացումէն ետք:
Անդրադառնալով տեղահանութեան թղթածրարին, Ժաաժաա յայտնեց, որ Լիբանան ապաստանած սուրիացի տեղահանուածներուն հարցը երկրին համար գոյութենական ճակատագրական խնդիր մըն է: «Մենք չենք կրնար ձեռնածալ մնալ, դիտելով երկրին շարունակական փլուզումը», ըսաւ Ժաաժաա, խոստանալով ոչինչ խնայել` կանխելու համար իրավիճակը յաւելեալ անկումը: Լիբանանեան ուժերու ղեկավարին համաձայն, Սուրիոյ մէջ այսօր իւրաքանչիւր խաւի համար կայ ապրելու ապահով տարածք: «Իսլամիստները կրնան ուղղուիլ Իտլիպ, իսկ նուազ ծայրայեղական ընդդիմադիրները հնարաւորութիւն ունին բնակելու երկրի հիւսիսային շրջանին մէջ: Կան նաեւ իշխանութիւններուն զօրակցող սուրիացիներ, որոնք կրնան դիւրութեամբ իրենց տուները վերադառնալ` վարչակարգի տիրապետութեան տակ գտնուող շրջաններուն մէջ», բացատրեց Ժաաժաա: Ան սուրիացիներու տեղահանութեան հարցով իր կուսակցութիւնը քննադատողներուն հարց տուաւ, թէ անոնք ինչ ըրին, երբ կառավարութեան մէջ ունէին աւելի քան 10 նախարար եւ ընդարձակ հնարաւորութիւններ:
Գործող կառավարութեան մէջ գաղթականներու հարցերու նախարար Իսամ Շարաֆըտտին ահազանգեց, թէ սուրիացիներու գաղթակայաններուն մէջ կան բազմաթիւ զինեալներ, որոնց թիւը կրնայ հատել նոյնիսկ քսան հազարը, որոնք պատրաստ են կռուելու: Խօսելով տեղահանութեան երեւոյթի վտանգաւորութեան մասին, նախարարի պաշտօնակատարը սուրիացիներու տունդարձին համար կարեւորեց արտաքին լուծումները, ապա Միացեալ նահանգներն ու Եւրոմիութիւնը ամբաստանեց տունդարձը խոչընդոտելու մէջ:
