ՀԱՅԿ ԿՈՆՃՈՐԵԱՆԸ ԸՆԴՈՒՆԱԾ Է ՉԵՆ ԺՈՒՆ
Հայաստանի Հանրապետութեան Ազգային ժողովի «Քաղաքացիական պայմանագիր» խմբակցութեան ղեկավար Հայկ Կոնճորեան ընդունած է Չինաստանի կոմունիստական կուսակցութեան Կեդրոնական կոմիտէի միջազգային վարչութեան փոխնախարար Չեն Ժուի գլխաւորած պատուիրակութիւնը:
Հանդիպման մասնակցած են նաեւ ԱԺ տարածաշրջանային եւ եւրասիական համարկման հարցերու մշտական յանձնաժողովի նախագահի տեղակալ Վաղարշակ Յակոբեանը եւ պատգամաւոր Ալխաս Ղազարեանը:
Հանդիպման ընթացքին զրուցակիցները ընդգծած են երկու երկիրներուն միջեւ առկայ դարաւոր ջերմ ու բարեկամական յարաբերութիւնները, որոնք յատկապէս վերջին տարիներուն կը զարգանան կանոնաւոր կերպով:
Զրուցակիցները կարեւորած են միջկուսակցական եւ միջխորհրդարանական կապերու ամրապնդումը, ինչպէս նաեւ տարբեր՝ առեւտրատնտեսական, կրթական եւ մշակութային ոլորտներուն մէջ համագործակցութեան խորացումն ու սերտացումը:
Երկուստեք կարեւորուած են փոխայցերն ու շփումները միջկուսակցական մակարդակով:
«Հայաստանի եւ Չինաստանի միջեւ բարեկամական եւ ջերմ յարաբերութիւնները դարերու պատմութիւն ունին: Ես համոզուած եմ, որ մենք ունինք ահռելի չօգտագործուած ներուժ եւ կրնանք շատ աւելիին յաւակնիլ եւ շատ աւելի մեծ արդիւնքներ արձանագրել ինչպէս տնտեսական, այնպէս ալ քաղաքական երկխօսութեան եւ մշակութային համագործակցութեան ոլորտին մէջ»,- մասնաւորապէս ըսած է Հայկ Կոնճորեանը:
Խմբակցութեան ղեկավարը չինացի հիւրերուն ներկայացուցած է Հայաստանի նախաձեռնած «Խաղաղութեան խաչմերուկ» նախագիծը՝ նշելով անոր ռազմավարական նշանակութիւնը ամբողջ տարածաշրջանին համար:
Հանդիպման աւարտին Չինաստանի կոմունիստական կուսակցութեան Կեդրոնական կոմիտէի միջազգային վարչութեան փոխնախարար Չեն Ժուն շնորհակալութիւն յայտնած է ջերմ ընդունելութեան համար, կարեւորած է բազմակողմ համագործակցութեան խորացումն ու ընդլայնումը տարբեր հարթութիւններու վրայ:
