ԸՍԱՒ ԾԵՐԱԿՈՒՏԱԿԱՆ ՄԵՆԵՆՏԵԶ
Միացեալ Նահանգներու ծերակուտական Պոպ Մենենտեզ, անդրադառնալով Լեռնային Ղարաբաղի մէջ Ատրպէյճանի կողմէ իրականացուած ցեղային զտումներուն, ափսոսանք յայտնած է, որ Միացեալ Նահանգներու ղեկավարութիւնը այդ ողբերգութեան արձագանգելու առումով աւելի ուժեղ եւ վճռական չէ եղած։
Այս մասին Մենենտեզ յայտարարած է Հայոց ցեղասպանութեան զոհերու յիշատակին, Հայաստանին ու Լեռնային Ղարաբաղին նուիրուած՝ «Արդարութիւն յանուն ցեղասպանութեան» միջոցառման ընթացքին։
Ան նշած է, որ այն, ինչ տեսած են Ատրպէյճանի կողմէ Լեռնային Ղարաբաղի մէջ իրականացուող ցեղային զտումներուն ժամանակ, ողբալի է, եւ ժամանակն է հաստատակամօրէն պնդելու, որ ԱՄՆ վարչակազմը հրաժարի Ատրպէյճանի կառավարութեան ռազմական աջակցութիւն տրամադրելէ։
