ԸՍԱԾ Է ԱՏԱՄ ՇԻՖ
Ամերիկայի Միացեալ Նահանգներու գոնկրէսի անդամ Ատամ Շիֆը կարծիք յայտնած է, որ ԱմՄՆ-ի կողմէ Հայոց ցեղասպանութեան ճանաչումէն եւ դատապարտումէն յետոյ պէտք է ըլլան իրական հետեւանքներ, քանի որ միայն խիստ յայտարարութիւններ ընելու ժամանակը վաղուց անցած է։
Այս մասին ան յայտարարած է Հայոց ցեղասպանութեան զոհերույիշատակին, ինչպէս նաեւ Հայաստանին ու Լեռնային Ղարաբաղին նուիրուած՝ «Արդարութիւն յանուն ցեղասպանութեան» միջոցառման ընթացքին։
«Մինչ մենք կ՛ոգեկոչենք Հայոց ցեղասպանութեան 109-րդ տարելիցը՝ երբեք չկրկնուելու խոստումներով, ժողովրդավար եւ խաղաղ հայ ժողովուրդը կը բախի իր ամենամութ օրերը յիշեցնող սպառնալիքներու: Վարչակազմին կողմէ միայն խիստ յայտարարութիւններով հանդէս գալու ժամանակը վաղուց անցած է։ Դատապարտման պէտք է հետեւին իրական հետեւանքներ»,- ընդգծած է գոնկրէսականը՝ համոզմունք յայտնելով, որ մարդկութեան դէմ յանցագործութիւնները չեն կրնար անտեսուիլ եւ չեն կրնար անպատասխան մնալ։
