Իրանէն Իսրայէլի ուղղութեամբ կատարուած հրթիռարձակումին հետեւանքով տարածաշրջանային սրած լարուածութեան զուգահեռ, երէկ ապահովական նոր զարգացումներ եղան Լիբանանի հարաւի սահմանային գօտիին վրայ: Հըզպալլա յայտարարեց, թէ ականուած ծրարով մը թիրախաւորած է իսրայէլեան յատուկ ուժերու խումբ մը, որ ներթափանցած էր Լիբանանի սահմանը: «Ուշադրութեամբ հետեւելով իսրայէլեան ուժերուն շարժումները, դիմադրութեան մարտիկները ականուած ծրարներ տեղադրեցին սահմանամերձ Թել Իսմայէլ շրջանին մէջ, իսկ երբ իսրայէլեան յատուկ ուժերու Կոլանի զօրախումբէն զինուորներ հասան նշեալ շրջանը, ականները պայթեցան՝ իսրայէլացիներուն պատճառելով մարդկային եւ նիւթական կորուստ», նշուեցաւ Հըզպալլայի յայտարարութեան մէջ: Իսրայէլեան բանակը իր կարգին յայտարարեց, թէ սահմանային գօտիին վրայ պատահած պայթումին պատճառով վիրաւորուած է չորս զինուոր: Իսկ իսրայէլեան լրատուամիջոցները հաստատեցին, որ պայթումը տեղի ունեցած է լիբանանեան հողի վրայ, ուր ներթափանցած էին իսրայէլացի զինուորները:
