«Մեր անվտանգութիւնը ապահովելու համար պէտք է կանգնինք մեր օրինականութեան գիծերուն վրայ, իսկ այդ՝ մեր միջազգայնօրէն ճանչցուած սահմանն է»: Այսպէս ըսաւ Հայաստանի վարչապետ Նիկոլ Փաշինեան՝ խօսելով անվտանգութեան ապահովումին մասին: Անոր խօսքով, երբ նկատի կ’առնուի միջազգայնօրէն ճանչցուած սահմանագիծը, այդ պարագային որեւէ կողմ հնարաւորութիւն չ՛ունենար արդարացնելու Հայաստանի դէմ իր յարձակումը: Համացանցային «Թելեկրամ» հարթակին վրայ հրապարակուած տեսանիւթին մէջ Փաշինեան խօսեցաւ նաեւ Հայաստանի Սահմանադրութեան մասին եւ շեշտեց, որ անոր հեղինակը պէտք է ըլլայ ժողովուրդը:
Եւրոմիութեան խորհուրդի Քաղաքական եւ անվտանգային հարցերով յանձնաժողովի անդամները ընդունած ատեն Հայաստանի վարչապետ Նիկոլ Փաշինեան յիշեցուց, որ, համաձայն նախկին պայմանաւորուածութիւններուն, Երեւանն ու Պաքուն պէտք է փոխադարձաբար ճանչնան տարածքային ամբողջականութիւնը: Փաշինեան հիւրընկալեց նաեւ Եւրոպայի խորհուրդի ընդհանուր քարտուղար Մարիա Պէյչինովիչ Պուրիչը, որուն հետ քննարկեց երկկողմանի կապերը եւ հայ-ատրպէյճանական զարգացումները: Եւրոպացի հիւրը յայտնեց, որ Հայաստանի «Խաղաղութեան խաչմերուկ» նախագիծը կրնայ դառնալ խաղաղութեան հոլովոյթի կարեւոր նախադրեալ մը: Փաշինեան իր կարգին նշեց, որ Արցախէն բռնի տեղահանուած անձերու հասցէագրումին եւ միջազգային աջակցութեան ցուցաբերումին մէջ կարեւոր է Եւրոպայի խորհուրդին դերակատարութիւնը: Պուրիչ գնահատեց այն, որ Հայաստան իր դիմագրաւած այս դժուար օրերուն տակաւին կարողութիւն ունի հետեւելու բարեփոխումներու զանազան ուղղութիւններուն:
Եւրոպացի պաշտօնատարը տեսակցեցաւ նաեւ Ազգային ժողովի նախագահ Ալէն Սիմոնեանի հետ: Զրուցակիցները շեշտեցին հայ ռազմագերիներուն եւ առեւանգուած անձերուն տունդարձի կարեւորութիւնը:
