Իրանի արտաքին գործերու նախարար Հըսէյն Ամիր Ապտոլլահըան երէկ այցելեց Դամասկոս, ուր անցեալ Ուրբաթ օր կործանուած էր Իրանի հիւպատոսարանը: Իր սուրիացի պաշտօնակից Ֆայսալ Մըքտատի հետ տեսակցութեան ընթացքին, իրանցի նախարարը Ուաշինկթընը ամբաստանեց Դամասկոսի յարձակումը իրագործելու կանաչ լոյս տալու մէջ, ուստի շեշտեց, որ Միացեալ Նահանգներ եւս կը կրէ պատասխանատուութիւն: «Սուրիա կը գտնուի դիմադրութեան ճակատի առաջնագիծին վրայ, ուստի կը կարեւորենք շարունակական խորհրդակցութիւնները», ըսաւ Ապտոլլահեան: Անոր խօսքով, Իսրայէլ ցեղասպանութիւն կը գործէ Կազայի մէջ եւ վստահաբար պիտի պատժուի Դամասկոսի մէջ կատարածին համար:
Սուրիացի նախարար Ֆայսալ Մըքտատ իր կարգին շեշտեց, որ Իրանի հիւպատոսարանին դէմ յարձակումը պիտի չմնայ առանց հակադարձութեան: «Կազայի մէջ իր զինուորական ձախողութենէն ետք, Իսրայէլ կը փորձէ ընդարձակել պատերազմին շրջագիծը», ըսաւ Մըքտատ եւ իր իրանցի պաշտօնակիցին հետ ներկայ գտնուեցաւ Իրանի դեսպանատան համալիրին մէջ հիւպատոսարանի նոր մասնաշէնքի բացումին:
