Միացեալ ազգերու կազմակերպութեան Մարդկային իրաւանց խորհուրդը իր վերջին ժողովին երկիրներէն պահանջեց զէնք չվաճառել Իսրայէլին, Կազայի պատերազմին պատճառով: Պահանջին մէջ նշուած է, թէ այդ զէնքը կրնայ գործածուիլ պաղեստինցիներու հանդէպ գործադրուող ցեղասպանութեան մէջ:
Այս ժողովի ընթացքին, Պաղեստինի ներկայացուցիչ Մոհամմատ Խրէյշա բոլոր երկիրներուն կոչ ուղղեց արթննալու եւ թոյլ չտալու, որ Իսրայէլ ցեղասպանութիւն կատարէ: Իսրայէլի ներկայացուցիչը իր երկրին դէմ կատարուած քուէարկութիւնը համարեց քաջալերանք պաղեստինեան «Համաս» շարժումին՝ շարունակելու համար իր գործը եւ արգիլելու իր երկիրը ինքնապաշտպամութեան իրաւունքէն: Խորհուրդի անդամ 47 երկիրներէն 28-ը որոշումին թեր քուէարկեցին: Վեց երկիրներ դէմ քուէարկեցին: Միացեալ Նահանգներ եւ Գերմանիա դէմ քուէարկողներու ցանկին վրայ էին: Իսկ 13 երկիրներ ձեռնպահ մնացին, որոնց մէջ Ֆրանսա, Հնդկաստան եւ Ճափոն: ԱՄՆ պատճառաբանեց իր դէմ քուէարկութիւնը, ըսելով, թէ որոշումին մէջ չկար դատապարտում «Համաս» շարժումին:
