«Երուսաղէմի Օր»ը Ռամատան ամսուան վերջին Ուրբաթ օրն է եւ այս օրը իր յատուկ կարեւորութիւնը ունի շիի համայնքին համար տարիներէ ի վեր հաստատուած սովորութեան մը համաձայն: Այս օրուան ընթացքին իր խօսած ուղերձին մէջ, Հըզպալլայի ընդհանուր քարտուղար սեյիտ Հասան Նասրալլա կատարեց կարգ մը յայտարարութիւններ: Ան հաստատեց, որ եթէ Իսրայէլ կը մտածէ յարձակիլ Լիբանանի վրայ, իրենք պատրաստ են եւ կազմակերպութեան գործածած զէնքը ցարդ իր ունեցածին մէկ փոքր տոկոսն է: Իսրայէլ պիտի տուժէ Լիբանանի դէմ ուղղուած որեւէ ռազմական գործողութեան պարագային: Հարաւային Լիբանանի սահմանը պիտի մնայ բաց այնքան ատեն որ չեն դադրած ռազմական գործողութիւնները Կազայի մէջ: Ըստ Նասրալլայի, Դամասկոսի մէջ իրանեան հիւպատոսարանին վրայ կատարուած իսրայէլեան յարձակումը նոր առիթներ պիտի տայ իրենց պատերազմին աւարտը մօտեցնելու համար: Իրանեան հակադարձութիւնը անպայման տեղի պիտի ունենայ, սակայն անոր ժամանակը, վայրը եւ ձեւը ձգուած են Իրանի ղեկավարութեան: Նասրալլա հաստատեց, որ շրջանի երկիրներուն մէջ քաղաքական բոլոր քայլերը կապ չունին Միացեալ Նահանգներու եւ Իրանի միջեւ տեղի ունեցող բանակցութիւններուն հետ:
