ՍԴՀԿ «Պանդուխտ» մասնաճիւղը նոր վարչութիւն ունի՝ կազմուած երիտասարդ անդամներէ: Այս առիթով եւ որպէս շնորհաւորանքի ու գնահատանքի արտայայտութիւն, Երկուշաբթի, 1 Ապրիլ 2024-ին, հաւաք մը կազմակերպուած էր Ռաուտայի ՀՄՄ ակումբին մէջ, ներկայութեամբ ՍԴՀԿ Կեդրոնական վարչութեան անդամ Ընկ. Ալեքսան Քէօշկէրեանի եւ Լիբանանի շրջանի Վարիչ մարմինի ատենապետ Ընկ. Վանիկ Տագէսեանի եւ անդամներու: Հաւաքին ներկայ էին նաեւ մասնաճիւղի նախկին ընկերներ եւ Տիկնանց միութեան անդամներ:
Ատենապետ Ընկ. Վանիկ Տագէսեան խօսք առնելով նախ շնորհաւորեց նորընտիր վարչութիւնը, ապա շնորհակալութիւն յայտնեց հին վարչութեան անդամներուն, յայտնելով որ անոնք օրինակ պիտի դառնան եւ իրենց խրատներով օգտակար դառնան նորընտիրներուն, որպէսզի անոնց գործը ճիշդ ու հեզասահ ընթանայ: Ընկ. Տագէսեան նոր ու հին սերունդին միջեւ միասնականութեան ու համագործակցութեան կոչ ուղղեց:
Հաւաքին ընթացքին «Պանդուխտ» մասնաճիւղի նորընտիր վարչութիւնը պարգեւատրեց վեթերան ընկերներ՝ Ալեք Սալպաշեանը, Սագօ Գասպարեանը, Վարդան Թութուշեանը, Արամ Պէքարեանը, Կարպիս Գասպարեանը, Վարդան Նորշահեանը եւ Յարութ Նազիկեանը:
Ընդունելութիւն եւ յարգանքի երեկոյ ի պատիւ ռաուտայի մատուռի հոգեւոր հովիւին
Չորեքշբաթի, 3 Ապրիլի երեկոյեան, ՍԴՀԿ «Պանդուխտ» մասնաճիւղի վարչութիւնը կազմակերպած էր ընդունելութիւն՝ ի պատիւ Ռաուտայի մատուռի հոգեւոր հովիւ Տ. Յակոբ Աւ. Քհնյ. Սաղիրին՝ շնորհաւորելով զայն աւագութեան տիտղոսին արժանանալուն առթիւ։ Ընդունելութեան ներկայ էին նաեւ մատրան Թաղական խորհուրդն ու Տիկնանց յանձնախումբը: Այս ուրախ առիթով տեղի ունեցաւ նաեւ կարկանդակի հատում: Վարչութիւնը ի սրտէ առողջութիւն եւ յաջողութիւն մաղթեց Տէր Հօր, մաղթելով որ ամենաբարի Աստուծոյ օգնականութեամբ Տէր Հայրը շարունակէ իր ժողովրդանուէր գործունէութիւնը՝ ի փառս հայ եկեղեցւոյ եւ ի պանծացումն իր ծուխի հօտին։
Արժանապատիւ Տ. Յակոբ Աւ. Քհնյ. Սաղիրը իր հերթին շնորհակալութիւն յայտնեց մասնաճիւղի վարչութեան եւ իր սրտի խօսքին մէջ նշեց, որ քահանային տրուած տիտղոսը եթէ իր անձին մնայ՝ անարժէք կ’ըլլայ, բայց այդ նաեւ կը տրուի շրջանի ժողովուրդին, հետեւաբար միասին գործակցելով աշխատանքը աւելի յաջողութիւն կ’արձանագրէ: Ան ըսաւ, որ ինք պիտի ծառայէ ազգին, ժողովուրդին եւ միութիւններուն, որոնց մաս կը կազմէ նաեւ «Պանդուխտ» մասնաճիւղը, անոր մաղթելով լաւ ապագայ:
Ներկաները մեծապէս գնահատեցին ՍԴՀԿ «Պանդուխտ» մասնաճիւղինորընտիր վարչութեան այս գեղեցիկ նախաձեռնութիւնը, մաղթելով յարատեւ վերելք եւ յաջողութիւն:
