Կիրակի, 17 Մարտ 2024-ին, հովանաւորութեամբ Արաբական Միացեալ Էմիրութեանց, Քաթարի եւ Շրջակայից Հայոց Թեմի Առաջնորդ՝ Գերշ. Տէր Մեսրոպ Արք. Սարգիսեանի, կազմակերպութեամբ Մշակութային Յանձնախումբին, տեղի ունեցաւ «Բարեւ» ասմուքի ելոյթը, կատարողութեամբ լիբանանահայ ասմունքող՝ Անի Սարաֆեան-Եփրեմեանի:
Հայ բանաստեղծական ծաղկեփունջի ներկայացման ներկայ էին եկեղեցւոյ հոգեւոր հովիւ՝ Տէր Արամ Տեքիրմենճեանը, գաղութի ղեկավար եւ ականաւոր անձնաւորութիւններ:
Ասմունքի ընթացքին, Անի Սարաֆեան-Եփրեմեան ներկայացուց արեւմտահայ եւ արեւելահայ բանաստեղծներու գոհարներէն, արժանանալով ներկաներուն բարձր գնահատանքին:
Շուրջ մէկ ժամ ելոյթի տեւողութեան ընթացքին, իւրաքանչիւր բանաստեղծութեան հետ ան ներկաներուն փոխանցեց իր հարազատ ապրումներն ու զգացումները, անթերի առոգանութեամբ եւ յիշողութեամբ: Կարգ մը ասմունքներու հետ իր մասնակցութիւնը բերաւ վաստակաւոր դաշնակահարուհի՝ Սուզաննա Մարտիրոսեան-Օհանեանը, իր հրաշալի կատարողութեամբ:
Ելոյթի աւարտին ներկաները իրենց հիացմունքն ու գնահատանքը յայտնեցին Տիկ. Եփրեմեանին, շեշտելով օտար ափերուն մէջ հայաբոյր ու հայաշունչ միջոցառումներու ծարաւն ու անհրաժեշտութիւնը: