24 Մարտին Հայաստանեայց Առաքելական Սուրբ Եկեղեցին տօնախմբեց մեր Տէր Յիսուս Քրիստոսի Երուսաղէմ յաղթական մուտքի յիշատակը` Ծաղկազարդը:
Տօնը տարիներ առաջ Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսի օրհնութեամբ հռչակուած էր մանուկներու օրհնութեան օր:
Այս առիթով, Առաւօտեան ժամերգութեան աւարտին՝ Մայր Աթոռի շրջափակին մէջ, Ամենայն Հայոց Հայրապետին հանդիսապետութեամբ կատարուեցաւ Անդաստանի արարողութիւն եւ մանուկներու օրհնութեան կարգ:
Նորին Սրբութիւնը իր օրհնութիւնը բաշխեց Մայր Աթոռին մէջ համախմբուած մանուկներուն, իսկ հաւատացեալներուն բաժնուեցան Անդաստանի ընթացքին օրհնուած ուռենիի ճիւղերը:
Բերկրաշատ տօնին առիթով Մայր Աթոռ Սուրբ Էջմիածինի միաբանութիւնը Պատարագի սրբազան արարողութեան մասնակցեցաւ Սուրբ Գայիանէ վանքին մէջ: Պատարագիչն էր Գէորգեան հոգեւոր ճեմարանի դասախօսական բաժնի ղեկավար գերաշնորհ Տ. Դանիէլ եպիսկոպոս Ֆընտըգեանը։
Դանիէլ Սրբազանը, անդրադառնալով օրուայ խորհուրդին, խօսեցաւ անցնող շաբաթներու նշանակութեան մասին` ընդգծելով, որ իւրաքանչիւր Կիրակի կարեւոր փուլ է Եկեղեցւոյ եւ հաւատացեալի կեանքին մէջ, իսկ Ծաղկազարդի խորհուրդով դուռ կը բացուի դէպի մեր Փրկիչի Յարութեան տօնակատարութիւններ։
Աւարտին, պատարագիչ Սրբազանը աղօթք վերառաքելով առ Աստուած, դիմեց հաւատաւոր ժողովուրդին՝ յորդորելով Ծաղկազարդի խորհուրդով լեցուած ընթանալ փրկութիւն ճանապարհով։
Սուրբ Պատարագի աւարտէն յետոյ Մայր Տաճարի զանգակատան առջեւ համախմբուած էին հայաստանեան տարբեր թեմերէ ուխտաւորաբար Մայր Աթոռ ժամանած շուրջ 600 արցախցիներ։
Արցախի թեմի առաջնորդ գերաշնորհ Տ. Վրթանէս եպիսկոպոս Աբրահամեանի հանդիսապետութեամբ կատարուեցաւ մանուկներու օրհնութեան կարգ, որմէ յետոյ անոնց ընծայուեցաւ Աստուածաշունչ մատեաններ, աղօթագիրքեր եւ խաչեր։
Արցախցի մանուկներուն եւ անոնց ընտանիքներուն համար Մայր Աթոռի միաբանական սեղանատան մէջ կազմակերպուեցաւ հիւրասիրութիւն, իսկ Էջմիածնի հայորդեաց տան մէջ՝ համերգային ծրագիր։
