Ռուսաստանի նախագահական ընտրութիւններուն Հայաստանէն քուէարկածներուն մեծամասնութիւնը, Էքզիթ փոլի տուեալներուն համաձայն, քուէարկած է «Նոր մարդիկ» կուսակցութեան անդամ, Ռուսիոյ Պետտումայի փոխխօսնակ Վլատիսլավ Տաւանքովի օգտին։
Հրապարակուած Էքզիթ-փոլի արդիւնքներով, Կիւմրիի մէջ քուէարկածներուն 48 տոկոսը իր ձայնը տուած է Վլատիսլավ Տաւանքովին, 21 տոկոսը՝ Վլատիմիր Փութինին, որ նախնական տուեալներով ընդհանուր ձայներու բացարձակ մեծամասնութեամբ վերընտրուած է նախագահի պաշտօնին։ Կիւմրիի մէջ քուէարկութեան մասնակիցներուն 1 տոկոսը քուէարկած է Ռուսաստանի լիպերալ-դեմոկրատական կուսակցութեան ղեկավար Լէոնիտ Սլուցքիի, 2 տոկոսը՝ Ռուսիոյ Կոմունիստական կուսակցութիւնը ներկայացնող Պետտումայի պատգամաւոր Նիքոլայ Խարիթոնովի օգտին։ Էքզիթ-փոլի արդիւնքներով, Կիւմրիի մէջ քուէաթերթիկներուն 10 տոկոսը անվաւեր եղած է։ Հարցումին մասնակիցներուն 19 տոկոսը մերժած է պատասխանել հարցումին, թէ որուն օգտին քուէարկած է։
Երեւանի մէջ քուէարկածներուն 63 տոկոսը, համաձայն Էքզիթ-փոլի, ձայն տուած է Վլատիսլավ Տաւանքովին։ Վլատիմիր Փութինի օգտին քուէարկած է 8 տոկոսը, 1-ական տոկոս ձայն Երեւանէն ստացած են Լէոնիտ Սլուցքին եւ Նիքոլայ Խարիթոնովը։ Երեւանի մէջ քուէարկութեան մասնակցածներուն 9 տոկոսը մերժած է պատասխանել հարցումին, թէ որուն օգտին քուէարկած է, անվաւեր համարուած է քուէաթերթիկներուն 17 տոկոսը։
Ռուսաստանի Արտաքին գործերու նախարարութեան պաշտօնական ներկայացուցիչ Մարիա Զախարովան յայտնած է, որ նախնական տուեալներով Ռուսաստանի նախագահական ընտրութիւններուն արտերկրէն մասնակցած է 372 հազար մարդ։ Ան նշած է, որ այս տուեալները նախնական են։
