Ռուսական Դաշնութեան Արտաքին գործերու նախարարութիւնը իր մօտ հրաւիրեց Մոսկուայի մէջ Միացեալ Նահանգներու դեսպան Լին Թրէյսին ու անոր փոխանցեց ազդարարագիր մը, այլեւս չօժանդակելու Ռուսիոյ «սեւ ցանկ»ին վրայ գտնուող ամերիկեան երեք ոչ-կառավարական կազմակերպութիւններու: Օժանդակութիւնը շարունակուելու պարագային, պիտի համարուի ռուսական օրէնքի խախտում իր բոլոր օրինական հետեւանքներով: Պահանջուեցաւ այդ երեք կազմակերպութիւններուն անունները վերցնել դեսպանատան կայքէջէն եւ ընկերային ցանցէն:
Նախարարութիւնը ազդարարեց, թէ երկրի ներքին գործերուն որեւէ միջամտութիւն պիտի ստանայ իր պատիժը, ներառեալ դեսպանատան պաշտօնեաներու վտարում երկրէն:
