Լիբանանի արտաքին գործերու նախարարի պաշտօնակատար Ապտալլա Պու Հապիպ հաստատեց, որ կառավարութիւնը իր քայլերը կը համակարգէ Հըզպալլայի հետ, հարաւային Լիբանանի մէջ ապահովական վիճակին առնչութեամբ: Ան զգուշացուց իսրայէլեան որեւէ յարձակումէ Լիբանանի վրայ, այս քայլը նկատելով սկիզբ շրջանային մեծ բախումի մը:
Պու Հապիպ յայտարարեց, թէ Իսրայէլի հետ համաձայնութիւնը պէտք է ըլլայ վերջնական ու հաստատեց, որ Լիբանան պիտի չենթարկուի իսրայէլեան ճնշումին: Հըզպալլա եւ հուսիներ յայտարարեցին, թէ պիտի դադրեցնեն իրենց գործողութիւնները, եթէ Իսրայէլ զինադադար յայտարարէ:
Լիբանանի խորհրդարանի նախագահ Նեպիհ Պըրրի հաստատեց, որ Լիբանան կը վճարէ իր պաղեստինցի եղբայրներուն զօրակցելու գինը: Լիբանան կը պաշտպանէ պաղեստինեան արդար դատը: Ըստ Պըրրի, Պաղեստինի անկումը կը նշանակէ ամբողջ շրջանին անկումը իսրայէլեան ազդեցութեան տակ, իր ժխտական հետեւանքներով:
