Յայտնի է հայազգի մեծանուն երգիչ, ՀՀ ազգային հերոս Շարլ Ազնաւուրի 100-ամեակին նուիրուած յուշարձանի նախագիծին յաղթող տարբերակը:
Ընդհանուր առմամբ ստացուած էր 60-է աւելի յայտ, իսկ ներկայացուած մանրակերտերուն տարբերակները կը գերազանցէին 100-ը: Յաղթող քանդակին հեղինակը Դաւիթ Մինասեանն է, որ 9 ձայնով յառաջ ինկած է մնացած տարբերակներէն, երկրորդ տեղը երկու ձայնով զբաղեցուցած է Արմէնակ Վարդանեանի քանդակը, որ խրախուսական դրամական պարգեւի պիտի արժանանայ:
Ընտրող յանձնաժողովի կազմին մէջ 11 հոգի էին, այդ շարքին՝ Երեւանի քաղաքապետ Տիգրան Աւինեանը, քաղաքապետի տեղակալ Լեւոն Յովհաննիսեանը, Երեւանի քաղաքապետարանի մշակոյթի եւ զբօսաշրջութեան վարչութեան պետ Գօշ Սարգսեանը, Շարլ Ազնաւուրի ընտանիքին անդամները, ոլորտի մասնագէտներ՝ նկարիչներ, քանդակագործներ, ճարտարապետներ եւ այլք:
Երեւանի քաղաքապետ Տիգրան Աւինեանի խօսքով՝ պիտի ընեն հնարաւորը, որ մինչեւ տարեվերջ յուշարձանը կանգնած ըլլայ Շարլ Ազնաւուրի անուան հրապարակին վրայ:
«Մենք ընդամէնը մտապատկերը համաձայնեցուցած ենք, ընտրուած տարբերակը մշակումներ պիտի անցնի, որ կրկին հանրութեան ուշադրութեան կեդրոնին պիտի ըլլայ: Սա Շարլ Ազնաւուրի 100-ամեակին նուիրուած կարեւոր կատարուելիք աշխատանքներէն մէկն էր: Ան մեր ազգին համար շատ մեծ նշանակութիւն ունի: Ան իր արուեստով, երգերով մեր ընտանիքները, մանկութիւնն ու երիտասարդութիւնը լեցուցած է: Վստահ եմ, որ այս քանդակը իրապէս պիտի արտացոլէ այն ներուժը, որ Ազնաւուրը իր կեանքի ընթացքին տուած է մեզի» ըսաւ քաղաքապետը:
Շարլ Ազնաւուրի որդին` Նիքոլա Ազնաւուրը շնորհակալութիւն յայտնեց բոլոր այն քանդակագործներուն, որոնք մասնակցած են մրցոյթին:
«Ես կը տեսնեմ, որ բոլորը իրենց հոգին ու սիրտը ներդրած են իրենց գործերուն մէջ: Դժուար էր ընտրութիւնը կատարել, բայց լիայոյս ենք, որ այն ինչ ընտրած ենք, պիտի արդարացնէ մեր եւ հասարակութեան սպասելիքները: Մենք այս քանդակին միջոցով կը տեսնենք նաեւ հասարակութեանը: Հայրս այս քանդակին մէջ մենակ չէ, այլ իր հասարակութեան հետ, որ շատ կարեւոր է», ընդգծեց Նիքոլա Ազնաւուրը:
Ան տեղեկացուց, որ Ֆրանսայի մէջ տեղադրուող քանդակին աշխատանքները ընթացքի մէջ են: Սակայն առաջինը պիտի բացուի Շարլ Ազնաւուրին անունը կրող այգին, որ պիտի ըլլայ Փարիզի կեդրոնին մէջ:
