Հայաստանը պատրաստ է Եւրոմիութեան հետ յարաբերութիւնները սերտացնելուն: Այս մասին խորհրդարանին մէջ լրագրողներու հետ զրոյցին ժամանակ ըսաւ Հայաստանի Ազգային ժողովի նախագահ Ալէն Սիմոնեանը:
Սիմոնեան դժգոհութիւն յայտնեց Հայաստանի դաշնակիցէն, խօսեցաւ ՀԱՊԿ-ի ու չաշխատող անվտանգային համակարգին մասին:
Անդրադառնալով հարցումին, թէ Հայաստանը պատրա՞ստ է ԵՄ-ի հետ յարաբերութիւնները սերտացնելու, անդամութեան թեկնածու դառնալուն՝ Սիմոնեան ըսաւ. «Մենք պատրաստ ենք: Եւ շարժելու ենք այն ուղղութեամբ, որ մեզ առաւել անվտանգութիւն կ’ապահովէ: Այսօր ժողովրդավար երկիր ըլլալը մեր անվտանգային ամենամեծ համակարգն է»:
Պատասխանելով հարցումին, թէ սա չի՞ նշանակեր, որ Հայաստանը արտաքին քաղաքական սլաք կը փոխէ, ինչո՞ւ կը հերքէ, ԱԺ նախագահը ըսաւ, որ չ՛ուզեր շտապել, չ՛ուզեր այնպէս ըլլայ, թէ միակողմանի քայլ կըկ կատարուի:
«Մեր գործողութիւնները ցոյց կու տան, որ ժողովրդավարութեան աւելի բարձր ցուցանիշեր ունինք, քան մեր շատ-շատ գործընկեր երկիրներ, որոնք արդէն ԵՄ անդամ են: Այդ չենք ըսեր մենք, այդ կ՛ըսեն ԵՄ-ի մեր գործընկերները: Կը կարծեմ, որ այդ ուղղութեամբ մենք պէտք է մտածենք: Բայց ես չեմ ուզեր շտապել: Պետութեան պարագային կտրուկ շարժումներ ընելը լաւ չէ», եզրափակեց Սիմոնեան:
