Ըստ քաղաքական աղբիւրներու, Իրանի արտաքին գործերու նախարար Հըսէյն Ամիր Ապտըլլահեանի Լիբանան կատարած վերջին այցելութիւնը տարբեր էր իր նախորդ այցելութիւններէն: Այս անգամ ան չէր եկած զգուշացնելու, այլ լուծումի առաջարկներ քննարկելու համար: Ներկայիս, Եգիպտոս եւ Քաթար կը վարեն բանակցութիւնները Կազայի մէջ պատերազմը դադրեցնելու համար: Այս արաբական երկիրները կապն են ԱՄՆ-ի եւ Իրանի միջեւ: Որպէս դրական արդիւնք, Իրաքի եւ Սուրիոյ մէջ հակաամերիկեան յարձակումները նուազեցան: Եմէնի մէջ պարագան տարբեր է, որովհետեւ Միացեալ Նահանգներ եւ Բրիտանիա կը յարձակին անոր վրայ: Եւրոպական միութիւն եւ ԱՄՆ չեն փափաքիր ռազմական գործողութիւններու ընդարձակումը:
Ցարդ ԱՄՆ-ի վարչակազմն է որ կ’արգիլէ Իսրայէլին Լիբանանի մէջ լայնածաւալ գործողութիւններ սկսելու: Ըստ նոյն աղբիւրին, յաջորդ երկու շաբաթները ճակատագրական են:
Ստոյգ աղբիւրներ հաստատեցին, որ չկայ որեւէ նշան լայնածաւալ իսրայէլեան յարձակումի մը: Ըստ նոյն աղբիւրին, ներկայիս տեղի ունեցողը կրակով ճնշումի միջոց մըն է Լիբանանին պարտադրելու համար Արեւմուտքի պայմանները, որոնց գլխաւորն է 1701 որոշումի գործադրութիւնը եւ Հըզպալլայի հեռացումը սահմանային գօտիէն: Իսրայէլ ներկայ պայմաններուն մէջ չի կրնար երկրորդ ճակատ մը բանալ, որ շատ աւելի վտանգաւոր է առաջին ճակատէն, նկատի առնելով Հըզպալլայի ունեցած կրակին ուժը:
