20 Փետրուարին, Մայր Աթոռ Սուրբ Էջմիածնի մէջ, Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսին նախագահութեամբ, սկիզբ առաւ Գերագոյն հոգեւոր խորհուրդի ժողովը ընդլայնուած կազմով:
Ժողովը բացուեցաւ Տէրունական աղօթքով, որմէ յետոյ Վեհափառ Հայրապետը ողջունեց Կ. Պոլսոյ Հայոց պատրիարք ամենապատիւ Տ. Սահակ արքեպիսկոպոս Մաշալեանի մասնակցութիւնը ժողովին։
Այնուհետեւ իր գնահատանքն ու օրհնութիւնը բերելով Գերագոյն հոգեւոր խորհուրդի հոգեւորական եւ աշխարհական անդամներուն` Ամենայն Հայոց կաթողիկոսը Սուրբ Հոգիին շնորհներն ու առաջնորդութիւնը հայցեց ժողովականներուն արդիւնաւէտ կերպով անցընելու ԳՀԽ հերթական ժողովը:
Ժողովի ընթացքին պիտի քննարկուին Հայաստանի եւ Արցախի շուրջ ընթացող զարգացումներուն, Արցախէն բռնի տեղահանուած հայորդիներուն առջեւ ծառացած մարտահրաւէրներու յաղթահարման, Արցախի հոգեւոր-մշակութային ժառանգութեան պահպանման առնչուող հարցեր։ Մասնաւոր անդրադարձ պիտի կատարուի տարուան ընթացքին Մայր Տաճարի վերօծման եւ Միւռոնօրհնութեան կազմակերպման։
Օրակարգին մէջ ընդգրկուած են նաեւ եկեղեցավարչական, թեմական, կրթադաստիարակչական տարաբնոյթ հարցեր։
