Միացեալ Նահանգներու, Միացեալ Թագաւորութեան եւ Եւրոպական միութեան մէջ 800 պատասխանատուներ ստորագրած են պահանջագիր մը, որ կը պահանջէ դադրեցնել Արեւմուտքի ղեկավարներու օժանդակութիւնը Իսրայէլի պետութեան Կազայի պատերազմին մէջ:
Ամերիկեան ՙՆիւ Եորք Թայմզ՚ օրաթերթը հաղորդեց, որ այս առաջին անգամն է, որ Ատլանտեանի երկու ափերէն պատասխանատուներ կը ստորագրեն այսպիսի նամակի մը տակ: նամակ մը, որ կը քննադատէ Արեւմուտքի պետութիւններու քաղաքականութիւնը պաղեստինցի ժողովուրդին նկատմամբ:
Բաց նամակին մէջ նշուած է, որ Արեւմուտքի պետութիւններու վարած քաղաքականութիւնը կը ցնցէ բարոյական հիմերը արդարութեան ու ազատութեան որպէս պահապան նկատուած այդ պետութիւններուն: Այդ քաղաքականւթեան արդիւնքն է պաղեստինցի ժողովուրդին սպանդը իսրայէլեան բանակին կողմէ: Սպանդ որ հասած է ցեղասպանութեան մակարդակին:
Հարկ է նշել, թէ այս բաց նամակին տակ ստորագրող անձերը կը պատկանին Արեւմուտքի պետութիւններու պետական պաշտօնեաներու ամենաբարձր դասին, ինչ որ ահազանգ մը կը նկատուի այդ պետութիւններու վարած քաղաքականութեան հետեւանքներուն մասին:
