20 եւ 21 Յունուարին, Հայաստանի արտաքին գործերու նախարար Արարատ Միրզոյեան Վիեննայի մէջ ամէնամեայ ժողովները գումարեց եւրոպական երկիրներու, Միացեալ Նահանգներու եւ Գանատայի մէջ հաւատարմագրուած հայ դիւանագէտներուն եւ միջազգային կազմակերպութիւններու մէջ հաւատարմագրուած Հայաստանի ներկայացուցիչներուն հետ: Միրզոյեան իր ելոյթին մէջ ներկայացուց Հայաստանի արտաքին քաղաքական ոլորտի զարգացումները, տարածաշրջանային իրավիճակը, Ատրպէյճանի հետ խնդիրները եւ խաղաղութեան օրակարգին վերաբերող մանրամասնութիւնները: Նախարարը ապա պատասխանեց ժողովականներու հարցումներուն եւ տեղի ունեցաւ միտքերու փոխանակումª միջազգային եւ տարածաշրջանային նիւթերու մասին:
Նշենք, որ Հայաստանի ու Ատրպէյճանի թղթածրարները նաեւ կը քննարկուին Եւրոմիութեան անդամ 27 պետութիւններու արտաքին գործերու նախարարներու հերթական ժողովին ընթացքին, որ տեղի կ’ունենայ Պրիւքսէլի մէջ, նախագահութեամբ Եւրոմիութեան գերագոյն ներկայացուցիչ Ժոզեփ Պորելի: Ժողովականներու քննարկումի գլխաւոր նիւթերը կ’ըլլան Ուքրանիոյ եւ Միջին Արեւելքի հակամարտութիւնները:
