Տաւոսի համաշխարհային տնտեսական համաժողովի ծիրին մէջ, Հայաստանի նախագահ Վահագն Խաչատուրեան հանդիպած է ՄԱԿ Փախստականներու հարցերով բարձր յանձնակատար Ֆիլիփփօ Կրանտիի հետ:
Զրոյցի ընթացքին երկուստեք դրական գնահատուած է Հայաստանի եւ Բարձր յանձնակատարի գրասենեակին միջեւ աւելի քան 30 տարուայ արդիւնաւէտ համագործակցութիւնը:
Հանդիպման ընթացքին անդրադարձ կատարուած է 2023 թուականի Սեպտեմբերին Լեռնային Ղարաբաղէն բռնի տեղահանուածներու մարդասիրական եւ ընկերային խնդիրներուն եւ անոնց լուծման ուղղուած քայլերուն:
Ֆիլիփփօ Կրանտին առանձնայատուկ կերպով հետաքրքրուած է աւելի քան 100 հազար արցախահայ փախստականներու ընկերային եւ բնակարանային ապահովուածութեան պայմաններով, մարդասիրական այլ խնդիրներով: Այս ծիրին մէջ, Հայաստանի նախագահը մանրամասն ներկայացուցած է կարճ ժամանակահատուածի մէջ Հայաստանի կառավարութեան իրականացուցած ծրագրերն ու միջոցառումները, որոնք ուղղուած են բռնի տեղահանուածներու ինչպէս առաջնային, այնպէս ալ համալիր խնդիրներու լուծման:
Հանդիպման աւարտին պայմանաւորուածութիւն ձեռք բերուած է շարունակելու աշխատանքային շփումներն ու սերտ համագործակցութիւնը առկայ հիմնախնդիրներու լուծման ուղղութեամբ:
